Amu Bispu sira hosi Dioseze Dili, Baukau no Maliana, ohin hasoru Primeiru-Ministru, Taur Matan Ruak, iha Palásiu Governu. Foto António Goncalves

DILI, 19 maiu 2020 (TATOLI)–Conferência Episcopál Timorense (CET) fó sai Komunikadu Pastorál datoluk, hodi reativa hikas selebrasaun Eukarístika Komunitária ne’ebé sei hahú vigora iha loron kinta-feira 28 fulan maiu tinan 2020 iha semana oin mai.

Notísia Relevante: CET Deside Sarani Sira Akompaña Misa Paskál Liuhosi Rádiu no Televizaun

Komunikadu ne’ebé fó sai husi Zekratariadu CET iha loron 19 maiu 2020 hateten, Moras Coronavirus (COVID-19) nu’udár surtu ne’ebé hada’et ona ba mundu kuaze nasaun hotu hetan ona virus ne’e, fasil liu atu hada’et bainhira ema barak halibur hamutuk.

Maibé, tuir komunikadu ne’e hateten, tuir informasaun hosi Centro Integrado Gestão Crise (CIGC) katak situasaun pandemia estável iha Timor-Leste, tanba ne’e CET deside atu loke fali selebrasaun Eukarístika Komunitária.

“Haree ba realidade ikus nian iha ita-nia nasaun no haree mós ba anseiu ita-nia komunidade sarani sira-nian rasik, tuir informasaun hosi Centro Integrado Gestão Crise (CIGC) katak situasaun pandemia estável iha Timor-Leste.  Tanba ne’e, CET deside atu loke fali selebrasaun komunitaria no fó orientasaun, desizaun sira kona-ba oinsá atu halo selebrasaun eukarístika,” komunikadu ne’e haktuir.

Iha komunikadu ne’e mós hateten, Kreda Timor akonsella ba Amu Pároku  no padre sira hotu atu bele hahú fali selebrasaun misa ho sarani sira iha loron 28 maiu ho rekomendasaun hirak tuir mao ne’e:

Primeiru, loke ba selebrasaun eukaristika de’it.

Segundu, misa dominikál no solenidade kuantu posivel halo kampál.

Terseiru, Misa kuotidiana iha Igreja laran maibé ho orientasaun sira ne’ebé fó sai tiha ona.

Kuartu, husu ba sarani sira atu uza máskara durante selebrasaun.

Kintu, husu ba amu pároku ho nia responsável sira atu prepara bee no sabaun, atu sarani sira fase liman no garante distansiamentu fíziku entre partisipante sira.

Sestu, Igreja fó konsellu ba sira ne’ebé mak moras, isin fraku, atu lalika mai misa, reza iha uma de’it.

CET mós Konvida ema hotu atu halo tuir nafatin rekomendasaun sira husi organizasaun saúde mundiál ho pesoál tékniku saúde nian tanba moras ne’e saidauk liu.

“Iha tempu susar hanesan ne’e, ita halo buat ne’ebé mak ita bele, buat ne’ebé ita labele ita husik iha Maromak nia liman. Husu ba sidadaun ida-idak atu hola responsabilidade ba povu hotu-hotu nia di’ak kona-ba saúde públika,” komunikadu hateten.

Komunikadu ofisiál ne’e, asinadu hsui Bispu Baukau no sekretáriu Jerál CET, Dom Basilio do Nascimento, Arsebispu Metropolitana Dili no Pró Prezidente CET, Dom Virgílio do Carmo da Silva, SDB, Bispu Maliana no Prezidente CET Dom Norberto do Amaral.

Entretantu, antes ne’e, CET fó sai komunikadu pastorál dahuluk hodi suspende misa komunitária, hahú iha meiu fulan marsu to’o ohin loron, hodi evita transmisaun virus Coroana ka Coronavirus (COVID-19).

Notísia Relevante: CET Aprova “Orasaun Komuñaun Espirituál”

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here