Ilustrasaun

DILI, 19 maiu 2020 (TATOLI)-Xefe Departementu Banku Urjénsia Ospitál Nasionál Guido Valadares (HNGV-sigla portugés), Todi de Jesus, relata durante fulan-abríl 2020, nia diresaun rejista kazu pasiente ho moras dengue hamutuk 131 iha ne’ebé maioria afeta ba labarik ki’ik.

“Husi 131 dengue ba ema adultu hamutuk 23 entaun númeru ne’e maka’as tebes iha ita-nia ra’in,”katak Xefe Departementu Banku Urjénsia HNGV ne’e ba jornalista sira iha ninia servisu fatin, tersa (19/05/2020).

Notísia Relevante :Dengue Atake Ema Na’in 1050, Ualu Mate

Profisionál Saúde HNGV konsege halo tratamentu saúde ho di’ak tanba pasiente sira rekupera hotu no laiha ema ida maka mate.

Alende ne’e, tuir relatóriu fulan-abríl nian rejista pasiente hamutuk 3.394 maka halo tratamentu saúde iha Banku Urjénsia. Husi sira ne’e ema na’in 1.744 mak konsege baixa no alta ona hodi fila ba sira-nia uma.

Notísia Relevante :Moras Dengue Domina iha Munisípiu Tolu

“Husi asidente motor, pasiente mane hamutuk 17 no feto hamutuk 27,” tenik tan.

Husi total kazu ne’e, nia tenik tan sira mós rejista kazu violasaun doméstika hamutuk 15 kompostu husi feto na’in ualu no mane na’in hitu maka halo tratamentu saúde durante fulan-abríl liubá.

“Tratamentu ba sira ne’ebé mak violasaun doméstika ne’e depende ba sira nia kanek hanesan bubu entaun ita halo tratamentu iha ne’e fó ai-moruk ba sira, no dalaruma ami mós haruka ekipa psíkolojia haree sira nia kanek depois mak haruka sira fila ba uma,”nia realsa liutan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here