Vise-Prezidente Parlamentu Nasionál, Maria Angelina Lopez Sarmento. Foto Tatoli/ Egas Cristóvão

DILI, 18 maiu 2020 (TATOLI)—Vise-Prezidente Parlamentu Nasionál, Deputada Maria Angelina Sarmento Lopes, sei keixa deputadu balun hosi Bankada Congresso Nacional da Reconstrução de Timor (CNRT) ba Ministériu Públiku  kona-ba aktu invade meza iha Parlamentu Nasionál.

“Ohin, ne’e sira invade meza parlamentu ne’ebé ke tuir loloos la’ós deputadu sira-nia kompeténsia. Ami sei keixa asaun ka aktu ne’ebé sira halo. Se sira invade nafatin meza, ami sei hola asaun ne’ebé sériu katak hakarak ka lakohi husu intervensaun polísia nian tanba invade meza ho illegal,” dehan Deputada Maria Angelina Sarmento Lopes ba jornalista sira iha Parlamentu Nasionál, segunda ne’e.

Deputada Partidu Libertasaun Populár (PLP) ne’e hateten, deputadu sira-ne’ebé kaer metin fatin ka kadeira prezidente parlamentu nian, ne’e komete ona krime ida tanba sira invade meza.

Vise-Prezidente PN ko’alia asuntu ne’e relasiona ho deputadu CNRT balun hosi CNRT ne’ebé la fó fatin ba nia atu lidera meza.

Nia afirma, rejimentu fó dalan ba vise-prezidente sira bele lidera meza, a não ser reprezenta prezidente parlamentu ba rai li’ur.

Vise-Prezidente PN ne’e hatutan, prezidente parlamentu rasik impede funsionamentu normál parlamentu nian tanba rejimentu fó dalan ba destituisaun.

Nia dehan, aktu deputadu CNRT ne’e mak boikota funsionamentu Parlamentu Nasionál.

Notísia Relevante: CNRT La Fó Fatin Ba Deputada Maria Angelina Tuur iha Arão Noé Nia Fatin

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here