Primeiru-Ministru, Taur Matan Ruak. Imajen /Egas Cristovão

DILI, 18 maiu 2020 (TATOLI)–Primeiru-Ministru (PM), Taur Matan Ruak hateten, maski iha tinan ne’e sei laiha komemorasaun ba loron restaurasaun independénsia ba dala-18 tanba surtu COVI-19 maibé Prezidente Repúblika (PR) Francisco Guterres “Lú Olo” sei hato’o mensajen ba povu no nasaun.

“Loron 20 maiu hanesan loron ne’ebé tinan-tinan ita sempre haksolok iha palsaiu nia oin. Ita nia Prezidente Repúblika sei fó ninia mensajen ba nasaun tomak, atu relemba ita-nia luta, ita-nia esforsu, ita-nia partisipasaun. Tanba,  nasaun ida ne’e sai nasaun ida ne’ebé mak ukun rasik aan, rekupera ninia indepensdénsia, loron ida ne’e nu’udr loron festa boot ba ita nia sidadaun sira,” dehan Taur Matan Ruak ba jornalista sira hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru Pité, Dili, segunda ne’e.

Xefe Governu ne’e esplika, tinan ida ne’e sei labele komemora tanba situasaun global, maibé Prezidente Repúblika sei haruka mensajen ba nasaun tomak no Governu sei kontribui atu espalla mensajen Prezidente Repúblika.

“Mensajen ne’e, atu ita hotu bele ida-idak iha nia fatin. Maibé, hanoin no fó importánsia nafatin ba 20 maiu nu’udár loron restaurasaun ita-nia independénsia,” PM Taur fó hanoin.

Antes ne’e, Vise Ministru Administrasaun Estatál (MAE), Abílio José Caetano hateten, perante situasaun Surtu Coronavirus (COVID-19), Timor-Leste labele komemora loron restaurasaun independénsia ba dala-18, iha loron 20 fulan maiu tinan nee’.

Maski nune’e, nia husu ba sidadaun hotu atu mantein unidade, banati tuir líder istóriku sira ne’ebé luta ba independénsia Timor-Leste nian.

Notísia Relevante: Pandemia COVID-19, TL La Komemora Loron Restaurasaun Independénsia

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here