Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 18 maiu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, informa prosesu implementasaun liña internet gratuita ba estudante ensinu Superiór sira daudaun ne’e sei atraza oituan tanba sei hein alokasaun orsamentu husi Sentru Intrgradu Jestaun Krize (CIGC).

Governante hato’o asuntu ne’e hodi responde ejijensia husi Reitór ne’ebé governu atu aselera prosesu implementasaun internet gratuita ba estudante sira.

Maski foinlalais ne’e, Governu liuhosi reuniaun Konsellu Ministru aprova ona orsamentu hamutuk rihun $ 600 hodi implementa programa refere.

Notísia Relevante :Governu Aprova Rihun $ 600 ba Internet Gratuita

“Ita kontinua esforsu an liuhusi pakote ekonómika nian ho área estratéjia mak hanesan telekomunikasaun ne’ebé tutela iha MTK ninia kompotensia ne’ebé ita hein de’it kooperasaun entre MTK ho operadór sira atu bele aselera prosesu ne’e,”katak Ministru ne’e ba Jornalista sira iha edifísiu MESSK Colmera, segunda (18/05/2020)

MESSK hamutuk ho Ministériu Transporte no Komunikasaun (MTK) sei hahu lansa projeitu ne’e ho kompañia telekomunikasaun tolu hanesan Telemor, Telcomsel no Timor-Telekom, hafoin CIGC aloka orsamentu ne’ebé maka governu aprovadu ona.

Iha fatin hanesan Vise Reitór III Universidade Dili (UNDIL), Hugo Lorenço da Costa, husu ba Governu liuhosi Ministériu Ensinu Superór Siénsia no Kultura atu aselera prosesu implementasaun liña internet gratuita ba estudante ensinu superior sira.

“Ami husu importante liu mak tenki aselera lalais instalasaun telekomunikasaun ne’e tanba ida ne’e parte ida husi emerjénsia nian mós tanba ligadu ho prosesu aprendijazen ba semester ida ne’e,” dehan nia ba jornalista sira hafoin halo enkontru ho Ministru Longuinhos dos Santos, segunda (18/05/2020).

Nune’e mós Reitór JSU, João Saldanha reforsa katak presiza implementa ona planu ne’e atu fasilita prosesu aprendijazen ba estudante sira.

“Ha’u husu no ejize ba Governu se hanoin atu implementa karik di’ak liu implementa ho lalais ona tanba estudante sira barak mak iha hotu foho,” nia hateten.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here