Pasaporte Repúblika Demokratika Timor-Leste (RDTL). Imajen/Espesiál

DILI, 18 maiu 2020 (TATOLI) – Iha loron 09 juñu 2020, Governu liuhusi Ministériu Justisa (MJ) sei lansa atendimentu públiku ba emisaun pasaporte eletróniku iha munisípiu sanulu (10).

Munisípiu hirak-ne’e kompostu husi Munisípiu Manatuto, Baucau, Viqueque, Lautem, Aileu, Liquiça, Ermera, Manufahi, Ainaro ho Covalima.

Ministru Justisa, Manuel Cárceres da Costa. Imajen/Egas Cristovão

Ministru Justisa, Manuel Cárceres da Costa, informa, ekipa tékniku husi Ministériu Justisa liuhusi Diresaun Nasionál Rejistu Notariadu (DNRN) daudaun ne’e mós iha faze finaliza ona hodi instala ekipamentu ba pasaporte eletróniku hodi hein lansamentu.

Através enkontru ho Primeiru-Ministru (PM), Taur Matan Ruak, iha Palacio do Governo, segunda (18/05/2020), Ministru Justisa Manuel Cárceres da Costa, husu disponibilidade Xefe Governu nian atu marka prezensa iha serimónia lansamentu refere.

“Lansamentu simbolikamente sei halo iha Munisípiu Manatuto,”  informa Manuel Cárceres ba jornalista sira.

Nia hatutan, Diresaun Nasionál Notariadu sei hahú emite pasaporte komún iha munisípiu ida-idak no komunidade sira la presiza mai trata iha Dili no ba daudaun ne’e, Munisípiu Bobonaro ho Rejiaun Administrativa Espesiál Oe-cusse Ambeno (RAEOA) mak bele emite pasaporte.

Ministru Manuel Cárceres da Costa hateten, ho lansamentu ne’e ba oin sei funsiona liu tan atendimentu serbisu públiku sira ne’ebé hatuur ona iha programa oitavu governu nian atu lori justisa ne’e hakbesik liu ba povu.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here