Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 18 maiu 2020 (TATOLI) – Haree ba kazu konfirmadu COVID-19 iha Timor-Leste ne’ebé rekuperadu hotu ona, maka sistema alerta no resposta COVID-19 ne’ebé antes ne’e iha alerta 3 “Mitigasaun”, fila ba faze alerta 1 “Kontensaun”, nune’e bele kontinua halo prevensaun ba an rasik.

Hahú Governu deklara kazu konfirmadu COVID-19 dahuluk iha Timor-Leste iha loron 21 marsu, maka iha loron 15 maiu, liuhosi Sala Situasaun, Sentru Integradu Jestaun Krize (CIGC, sigla portugés) deklara husi kazu konfirmadu na’in-24 no kazu provável na’in-haat rekuperadu hotu ona.

“Hakarak fó hanoin hikas ba públiku katak, hare husi nível alerta no resposta ne’ebé Governu Timor-Leste adopta ba prevensaun no mitigasaun COVID-19 iha Timor-Leste, hahú loron 15 maiu ita sai husi faze ne’ebé hanaran alerta 3 ka faze mitigasaun ba fali faze ne’ebé hanaran alerta 1 ka faze kontensaun”, dehan Portavóz CIGC, Rui Maria de Araújo liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Tuir Koordenadór Ligasaun Ofisiál ba Forsa Tarefa ne’e, maski laiha ona kazu ativu maibé nafatin alerta tanba kazu konfirmadu iha nasaun viziñu Timor Osidentál, Indonézia aumenta ba bebeik.

“Ita sai husi alerta 3 hodi fila ba alerta 1, tamba maski iha Timor-Leste la iha ona kazu ativu maibé ita nia viziñu ne’ebé halo fronteira terrestre ho ita, ninia kazu detetadu aumenta ba beibeik inklui mós kazu mate tamba COVID-19”, nia subliña.

Nune’e, nia apela ba populasaun tomak, liuliu joven sira, maski Timor-Leste fila ba faze alerta 1 ne’ebé bolu kontensaun maibé husu atu nafatin kumpre disiplina regra distansimentu sosiál kolektivu.

“Labele halibur malu ka la’o rame-rame liu ema na’in-lima, uza nafatin máskara bainhira sirkula iha fatin públiku no fatin ne’ebé ema barak hanesan loja, servisu fatin, bazar no seluk seluk tan, fase liman bebeik no evita kose liman ba ibun, inus no matan”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here