Ministru Justisa, Manuel Cárceres da Costa. Imajen/Antonio Goncalves

DILI, 18 maiu 2020 (TATOLI)-Governu liuhusi Ministériu Justisa (MJ) rekomenda ona lista naran prizioneiru ka kondenadu na’in-219, ba Prezidente Repúblika (PR), Francisco Guterres “Lú Olo” atu bele hetan komutasaun pena no indultu iha komemorasaun loron restaurasaun independénsia iha 20 maiu 2020.

Notísia Relevante : Lista Dadur Atu Hetan Indultu La Inklui Eis Membru Governu

Lista naran kondenadu lubun ne’e, inklui mós kondenadu eis Sekretáriu Estadu Fortalesimentu Institusionál  (SEFI), Francisco da Costa Soares “Borlaco”.

“Prosesu sira-ne’e iha lista dadur na’in-219, ami haruka ona ba Prezidénsia Repúblika hodi husu pedidu komutasaun pena no indultu iha komemorasaun loron restaurasaun independénsia, 20 maiu 2020,” informa Ministru Justisa Manuel Cárceres da Costa, ba jornalista, hafoin enkontru ho Primeiru-Ministru (PM), Taur Matan Ruak, iha Palacio do Governo, segunda (18/05/2020).

Liuhusi enkontru ne’e, Ministru Manuel Cárceres da Costa mós informa ba Primeiru-Ministru kona-ba lista prizioneiru na’in-219 ne’ebé haruka ona ba PR atu bele fó komutasaun pena no indultu.

Nia hatutan, prizioneiru sira ne’ebé naran tama iha lista ne’e mai husi Prizaun Becora, Prizaun Gleno ho Prizaun Suai.

Ministru Manuel Cárceres da Costa, afirma, kritéria ba dadur sira atu hetan indultu no komutasaun pena mak tenke kumpre metade pena inklui liuhusi avaliasaun iha komportamentu di’ak durante iha prizaun laran.

Husi prosesu ne’e, Manuel Cárceres esplika, advogadu no dadur ho família dadur liu husi dirijente estabelesimentu prizaun sira mak hatama pedidu ba Ministériu Justisa mós husu paresér ba Tribunál ho Ministériu Públiku hafoin prosesa no haruka ba Xefe Estadu atu dekreta.

TR Kondena Francisco Borlaco ho Pena Efetivu Tinan-Haat  

Tribunál Rekursu (TR) iha loron 17 Setembru 2018, hasai desizaun ba kazu Francisco Borlaco, hodi aplika pena prizaun efetivu tinan-haat (4) no selu mós indemnizasaun $106. 173, 84 ba Estadu.

Desizaun  TR nian ba Antigu Diretór Aprovizionamentu Nasionál  iha Ministériu Finansa,  Francisco da Costa Soares “Borlaco”  ne’e ho nia númeru NUC. No. 0230/14.PDDIL, deside husi Juis Koletivu iha Tribunál Rekursu.

TR konsidera kondenadu Francisco Borlaco involve iha prosesu pagamentu ba projetu konstrusaun ospitál referénsia ne’ebé seidauk remata no kampaña abandona hela, maibé kondenadu Francisco Borlaco uza nia podér halo ona pagamentu.

Iha loron 26 outubru 2018, Polísia Munisípiu Dili ezekuta mandadu husi Tribunál Distritál Dili (TDD) hodi halo kapturasaun  obrigatóriu ba Borlaco iha nia rezidénsia iha Likintae, Taibesi, hodi lori ba Prizaun Becora, Dili.

Antes ne’e, iha tinan 2017 liuhusi desizaun primeira instánsia Tribunál Distritál Dili (TDD) kondena Francisco Borlaco ho pena prizaun tinan-hitu (7) no selu indemnizasaun $106.173,84. Maibé kondenadu Francisco Borlaco la simu desizaun ne’e, hodi halo rekursu ba Tribunál Rekursu liuhusi nia Defeza Câncio Xavier, atuál Prezidente Defensoria Públiku.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here