Primeiru-Ministru, Taur Matan Ruak. Imajen /Egas Cristovão

DILI, 18 maiu 2020 (TATOLI)–Primeiru-Ministru (PM), Taur Matan Ruak fó ona instrusaun ba Centro Integrado Gestão Crise (CIGC), atu halo levantamentu kona-ba moras Coronavirus (COVID-19) iha munisípiu sira, hodi sai sasukat ba estensaun Estadu Emerjénsia (EE) ba períudu datoluk.

Taur Matan Ruak ko’alia asuntu ne’e, hafoin enkontru semanál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru-Pité, Dili, ohin.

“Ita-nia atensaun tenke makaas loos, atubele halo teste iha munisípiu hodi haree katak iha-ne’ebá sei iha ka lae. Ita mós komesa hanoin, hanesan ohin ha’u fó ona instrusaun ba Centro Integrado Gestão Crise (CIGC), atubele halo levantamentu no fó sira-nia pereser kona-ba pasu saida mak ita tenke fó, hafoin Estadu Emerjénsia no presiza halo estensaun ka lae. Se presiza karik tanba saida. Se la presiza, medida saida mak ita tenke toma. Tanba ita hatene katak, iha ita-nia viziñu ne’e, Indonézia própriu liuliu provínsia Nusa Tenggara Timur (NTT), iha kabupaten Kefa iha ona moras Covid no tama mai iha-ne’e (Timor) mós komesa iha. Ne’e signifika, fronterira terrestre ho ita ne’e, ninia preokupasaun ne’e boot lahalimar”, Taur esplika ba jornalista.

Xefe Governu ne’e hateten, ho instrusaun ne’ebé iha, atu CIGC bele haree hotu pur-menór sira-ne’e, atu nune’e bele preparadu liután, nune’e bainhira ho Estadu Emerjénsia bele hakbiit ita-nia an hodi responde kuandu nesesáriu.

Tanba ne’e, PM Taur hatutan, durante enkontru semanál ho Xefe Estadu, levanta duni kestaun ida-ne’e, liuliu kona-ba implementasaun Estadu Emerjénsia, dezenvolvimentu COVID-19 no ida seluk kona-ba  situasaun seguransa iha rai-laran.

“Implementasaun Estadu Emerjénsia, ohin ita iha ona loron 18 fulan-maiu, falta loron hira tan, ita kompleta ona fulan ida tan, hodi tama ba fulan daruak nian. Se ita haree didi’ak iha implementasaun la’o di’ak. Dalaruma ita-nia populasaun flexibiliza movimentasaun makaas uitoan no barak liután, maibé iha ninia forma jerál di’ak.

Kona-ba rezultadu moras nian, Xefe Governu mós aprezenta ba Xefe Estadu katak  laiha ona. Sira ne’ebé antes ne’e kazu pozitivu agora rekopera hotu ona no númeru zero, maibe COVID ne’e sei iha.

Ho ida-ne’e maka Prezidente Repúblika kontinua fó konfiansa ba Primeiru-Ministru, husu atu tau atensaun makaas ba buat rua ne’ebé maka iha. Ida maka COVID 19, Xefe Estadu lakohi atu ninia sidadaun sira moras no mate tanba moras ida-ne’e.

“Tanba ida-ne’e maka ohin ha’u mos husu, katak, atu ida-ne’e labele akontese, ha’u husu apoiu populasaun hotu nian, inan-aman nian, joven sira-nian, ita-hotu nian tanba Governu mesak labele. Ita hotu hamutuk ita bele. Ita hatudu ona katak ita-nia profisionál saúde sira, PNTL, F-FDTL hotu-hotu inklui joven sira, servisu di’ak loos. Segundu maka ita hakarak atu ita-nia ekonomia tenke rekopera. Osan tenke sirkula filafali, família sira hahán tenke iha no nasaun tenke di’ak bá-oin. Ne’e mak ezijénsia Prezidente Repúblika nian”, PM Taur hakotu.

Entretantu, oras ne’e, Timor-Leste iha hela Estadu Emerjénsia fulan daruak, ne’ebé Prezidente Repúblika rasik deklara iha loron 28 fulan-abríl no sei termina iha loron 26 fulan ne’e.

Jornalista: Cipriano Colo

Editór: Cancio Ximenes

1 KOMENTÁRIU

  1. TL la presija tan estensaun EE ba dala tolu tamba moras laiha ona,
    no saida mak ita tenke halo:
    1. seguransa maximu iha AREA TERESTE OU MOTA AIN no TASI TENKE MAXIMU..MAXIMU..MAXIMU..
    2. labele loke lai aeroportu no tereste hodi nune’e ema labele TAMA no SAI.
    3. enkoraja nafatin populasaun para fase liman ho sabaun
    4. utilija be’e tangki nebe monta iha fatin2.
    HO IDA NE’E HOTU populasaun sei lao livre hodi halao moris nudar agricultor, servidor guvernu, servidor kompania no seluk2 tan
    obrigada wa’in

Leave a Reply to lili barros Cancel reply

Please enter your comment!
Please enter your name here