Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 18 maiu 2020  (TATOLI) – Maski Governu deside taka ona fronteira terrestre durante Estadu Emerjénsia hodi evita propagasaun surtu COVID-19 tanba kuaze kazu konfirmadu iha Timor-Teste konsidera hanesan importadu husi nasaun efetadu, maibé nafatin iha sidadaun ne’ebé sei tama klandestina.

Portavóz Sala Situasaun Sentru Integradu Jestaun Krise (CIGC, sigla portugés), Rui Maria de Araújo, informa durante Estadu Emerjénsia sidadaun ne’ebé maka tama iha territóriu Timor-Leste husi fronteira terrestre hamutuk na’in-110.

“Aproveita oportunidade atu informa mós ba populasaun tomak katak, sei nafatin iha sidadaun Timor-Leste ne’ebé klandestinamente hakat liu fronteira terrestre husi Indonézia mai Timor-Leste ninia territóriu, husi períodu hahú Estadu Emerjénsia to’o ohin loron ho totál iha ema na’in-110”, dehan Portavóz CIGC liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Husi totál ne’e, ema na’in-48 tama husi Fronteira Batugade, husi Fronteira Salele na’in-ualu, Fronteira Oesilo no Sakato hamutuk na’in-58.

“Iha loron 15 maiu lorokraik no 16 maiu kalan, Polísia Unidade Patrullamentu Fronteira (UPF) ka’er sidadaun Timor-Leste na’in-haat iha rai-ketan Oé-cusse”, nia haktuir.

Koordenadór Ligasaun Ofisiál ba Forsa Tarefa ne’e salienta, haree ba númeru kazu iha provínsia Timór Osidentál, Indonézia ne’ebé aumenta ba beibeik, inklui ho kazu mate tamba moras COVID-19 maka Estadu Maiór Konjuntu Sala Situasaun CIGC apela ba populasaun tomak, liuliu ba sira ne’ebé besik fronteira terrestre hanesan Munisípiu Covalima, Bobonaro no Rejiaun Administrativa Espesiál Oé-cusse Ambeno (RAEOA) atu hakmatek iha fatin.

“Husu atu tuur hakmatek iha ida-idak ninia fatin no labele hakat ba mai iha rai-ketan ho Indonézia, hodi nune’e la monu ba risku, hetan da’et moras COVID-19, no lori mai hada’et tutan iha Timor-Leste”, nia akresenta.

Tuir Portavóz CIGC, daudaun ne’e FALINTIL-Forsa Defeza Timor-Leste (F-FDTL) hamutuk ho Polísia Nasionál Timor-Leste (PNTL) sei nafatin fó apoiu ba malu hodi asegura fronteira terrestre.

“Liuhosi kolaborasaun ho líder komunitáriu sira, sei nafatin halo vijilánsia másima iha dalan klandestina sira hotu iha rai-ketan entre Timor-Leste ho Indonézia. Tanba ne’e di’ak liu tuur hakmatek iha uma”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here