Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 18 maiu 2020 (TATOLI) – Portavóz Sala Situasaun, Sentru Integradu Jestaun Krise (CIGC, sigla portugés) Rui Maria de Araújo, informa rezultadu laboratóriu negativu ba moras COVID-19 iha Timor-Leste sa’e ba 1.117 kompara ho loron-rua liubá no daudaun seidauk rejista kazu pozitivu foun.

“Totál komulativu rezultadu laboratóriu negativu loron rua liu hamutuk na’in-855 maibé ohin nia hamutuk 1.117″, dehan Portavóz CIGC liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Husi kazu ne’e, totál komulativu kazu konfirmadu hamutuk na’in-24 no kazu provável hamutuk na’in-haat maibé rekuperadu hotu ona.

“Totál kazu konfirmadu foun zero durante semana tolu ho balun ona no totál komulativu ezame laboratóriu horiseik iha 1.346 no ohin loron rejista hamutuk 1.498”, nia akresenta.

Nune’e mós, totál komulativu hein rezultadu laboratóriu iha loron rua liu ba iha 467 no ohin tun ba 357.

Enkuantu, totál komulativu amostra husi triajen sentinela iha loron rua liu ba iha 63 (negativu porsentu 58 to’o 92).

Koordenadór Ligasaun Ofisiál ba Forsa Tarefa ne’e informa, totál komulativu amostra husi vijilánsia sentinela loron rua liu ba iha 770, maibé ba ohin loron sa’e ba 801, ne’ebé porsentu 44 hatudu ona rezultadu negativu.

Totál ema iha kuarantena ka konfinamentu obrigatóriu hamutuk na’in-87, ne’ebé kompostu husi 38 iha auto-kuarantena iha Dili no na’in-rua auto-kuarantena iha munisípiu seluk, 41 iha fasilidade Governu nia iha Dili no na’in-neen iha fasilidade Governu nian iha munisípiu seluk.

“Totál ema ne’ebé liu ona períodu kuarantena ka konfinamentu obrigatóriu hamutuk na’in-2.242, kompostu husi 500 iha munisípiu sira seluk no na’in-1.742 iha Dili”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here