Logotipu Tane Konsumidór. Imajen/Espesiál

DILI, 17 maiu 2020 (TATOLI) – Relasiona ho Loron Mundiál Telekomunikasaun no Sosiedade ba Informasaun ne’ebé kada tinan sempre selebra iha loron 17 maiu, Asosiasaun Tane Konsumidór ne’ebé hanesan Defeza ba Konsumidór iha Timor-Leste hetan keixa barak husi konsumidór relasiona ho kualiadade prestasaun servisu iha área telekomunikasaun.

Daudaun ne’e, operadór telemomunikasaun ne’ebé iha Timor-Leste maka hanesan Timor-Telecom, Telkomcel no Telemor.

“Keixa husi konsumidór sira barak liu kona-ba kualidade ba prestasaun servisu esensiál sira ligadu ho telekomunikasuan nian, tanba ne’e situasaun ne’e prejudika direitu no interese ba konsumidór sira nian”, refere nota imprensa husi Tane Konsumidór ne’ebé Agência Tatoli asesu iha domingu ne’e.

Nota ne’e subliña, iha biban Estadu Emerjénsia daudaun ne’e tanba konsekuénsia husi pandemia COVID-19, asosiasaun ne’e hetan keixa barak husi konsumidór sira kona-ba informasaun ne’ebé ladún loos husi operadór telekomunikasaun sira.

“La hato’o informasaun ne’ebé loos ba konsumidór sira, la tuir espetativa no prejudika sira-nia interese iha biban ne’ebé ema hotu hasoru problema rendimentu tuun. Iha krize pandemia ne’ebé telekomunikasaun nu’udar servisu esensiál no interese públiku, konsumidór sira sente ignoradu”, salienta asosiasaun ne’e.

Tuir nota husi Tane Konsumidór, haree ho atensaun ba kontiúdu publisidade servisu telekomunikasaun nian la korresponde ho realidade ne’ebé konsumidór sira simu.

“Buat sira hotu mak hato’o liuhosi anúnsiu sira, la korresponde ho realidade no ladún iha informasaun importante sira ne’ebé mensiona”, afirma asosiasaun ne’e.

Nune’e mós, Tane Konsumidór husu fatura ho komprativu sira ho ninia períodu ba garantia produtu sira ne’ebé konsumidór sira hetan, hafoin bainhira iha kazu a’at ruma, konsumidór sida bele reklama.

La haluha mós, avalia servisu sira ne’ebé oferese hanesan pakote telekomunikasaun, liuliu kona-ba kapasidade no ninia velosidade.

“Importante liu maka sempre husu bainhira iha dúvida ruma, tanba informasaun ne’e direitu konsumidór sira nian”, realsa.

Liuhosi biban ne’e, Tane Konsumidór husu ba Autoridade Nacional das Comunicações (ANC), nu’udar entidade reguladora ba telekomunikasaun, hodi kumpre ninia dever sira.

“Liuliu liga ba protesaun ba direitu konsumidór nian, supervisiona ba setór telekomunikasaun no eziji mós atu kumpre kuadru lejizlativu sira”, akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here