COVID-19

DILI, 17 maiu 2020 (TATOLI)-Enfermeiru voluntáriu ba prevensaun COVID-19 hamutuk na’in 11 iha Ospitál Rejionál Eduardo Ximenes (HoREX-sigla portugés) daudauk ne’e preokupa ho desizaun Diretór nian tanba hapara ona sira iha ekipa prevensaun.

“Hahú husi loron 20 de abríl iha momentu ne’ebá pesoál saúde laiha atu serbisu iha Triazen HoREX ho nune’e ami voluntáriu oferese ami-nia an ba serbisu voluntáriu hakarak atu serbí nasaun ,” dehan Portavóz Ekipa Voluntariu COVID-19, Atanásio da Costa Flores ba TATOLI, foinlalais.

Nia konta tuir katak ekipa ne’e hahú oferese sira-nia an ho voluntariamente iha loron 20 fulan-abríl 2020 maibé iha loron 11 fulan-maiu tenki para tuir desizaun Dirijente ospitál ne’e nian.

Tanba ne’e, Voluntáriu sira konsidera desizaun ne’e hamosu deskriminasaun tanba ospitál presiza sira-nia kontribuisaun iha situasaun defisil de’it.

Hatan ba Preokupasaun ne’e, Diretór Klínika Ospitál Rejionál Eduardo Ximenes Baucau, Salesiano Fernandes Pinto ba TATOLI katak nia parte ezekuta desizaun ne’e baseia ba rezultadu enkontru ho diresaun Nasionál katak tenki hapara ona voluntáriu sira iha programa triazén no vijilánsia sentinela.

“La’ós ami mak hakarak hasai sira maibé ami bazeia ba orientasaun husi nasionál ne’e mak momentu ami hapara tan ne’e mak ami entrega fali sira ba iha sentru Informsaun Integradu Munisípiu Baucau nian,” katak nia, via telefone ba TATOLI, sábadu (16/05/2020).

Tuir desizaun Governu nian katak ekipa voluntáriu sira sei la hetan subsídiu tanba ne’e HoREX obrigadu tenki hapara sira iha programa ne’e.

“Loloos ne’e ami sei prezisa sira maibé orientasaun husi nasionál mak ami hapara ne’e no ha’u rasik mak simu orientasaun ne’e mak ami enkontru liuhosi Xefe Departamentu sira mak ami deside hapara sira,”nia esklarese liután.

Enfermeiru voluntáriu na’in 11 ne’e la’ós ospitál maka husu sira hodi kontribui maibé rekomenda husi Komisaun Prevensaun CVID-19 ne’ebé lidera diretamente husi Prezidente Autoridade Baucau.

Nia esplika tan esplika ona desizaun ne’e ba pesoál voluntáriu na’in 11 ne’e foinlalais maibé sira kontinua la satisfeitu.

Mezmu nune’e, ospitál sei oferese sertifikadu apresiasaun ba sira nia kontribuisaun durante implementasaun programa triazen no vijilánsia sentinela.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here