Bandeira RDTL.Imajen/Antonio Goncalves

DILI, 17 maiu 2020 (TATOLI) – Falta loron tolu tan Timor-Leste komemora loron Restaurasaun Independénsia ba dala-18, ne’ebé kada tinan kuaze munisípiu hotu hala’o atividade hodi komemora loron importante ne’e, maibé tinan ida ne’e kuaze munisípiu hotu laiha atividade tanba surtu COVID-19 inklui Covalima.

Admistradór Munisípiu Covalima, Afonso Nogeira Nahak, hateten tinan ne’e laiha atividade, maibé nia parte orienta de’it populasaun atu dada bandeira iha ida-idak ninia uma oin inklui resintu Instituisaun Estadu.

“Hakarak hato’o katak iha situasaun COVID-19 ne’e maka tuir orientasaun husi Ministériu Administrasaun Estatál liuhosi Diresaun Administrasaun Lokál katak tinan ne’e laiha isar bandeira, maibé husu ba administradór no líder komunitáriu hodi orienta ninia populasaun sira atu hasa’e bandeira iha ida-idak nia uma oin”, informa administradór ba Agência Tatoli iha nia knaar fatin, Administrasaun Covalima, foin lalais ne’e.

Tuir Afonso Nogeira, daudaun ne’e komunidade iha Covalima hahú ona hasa’e bandeira iha uma oin inklui Instituisaun Estadu sira, nu’udar jestu komemorasaun loron istóriku.

Nia salienta tanba surtu ne’e maka halo buat hotu paradu tanba ne’e nia iha esperansa surtu ne’e bele ramata ona, nune’e atuvidade sira bele la’o ho normál.

“Ita atu hala’o atividade situasaun maka la permite ona, maibé ita nafatin hasa’e bandeira”, nia adianta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here