Timoroan Na'in Ida sai ona hosi Fatin Izolamentu Sentru Saude Vera Cruz. Imajen/Egas Cristovao

Kazu pozitivu timoroan ida ne’ebé deteta iha Timor-Leste, deteta mai hosi klaster ne’ebé mak iha Hotel Katuas, Dili. No, kazu primeiru ne’ebé mak identifika iha 21 marsu 2020, timoroan ne’ebé primeiravez deteta hanesan kazu pozitivu COVID-19 mai hosi Hotel Katuas, no timoroan ne’e sai ultima pesoa mak ohin sai hosi fatin izolamentu Vera Crus, Dili, Timor-Leste.

DILI, 16 maiu 2020 (TATOLI)—Iha sábadu (16 maiu 2020) lorokraik, iha sala sentru mídia Sentru Integradu Jestaun Krize (CIGC, sigla portugés), Merkadu Lama, Dili, la hanesan baibain. Iha lorokraik ne’ebá, la’os de’it portavós CIGC mak atualiza dadus COVID-19 maibé aprezenta mós pasiente rekuperadu hosi moras surtu COVID-19 ne’e.

Jornalista sira fó basa-liman hodi simu hasoru, bainhira Portavós Sentru Integradu Jestaun Krize, Odete Viegas, iha ambaun nia oin no haklaken liuhosi mikrofone katak pasiente rekuperadu ne’e (inan feto ida) sei haktuir ninia viajen hosi Indonézia, tama iha fatin kuarentena Hotel Katuas to’o baixa iha fatin izolamentu Vera Crus.

Pasiente Rekuperadu Hasasin

Ha’u tama iha Hotel Katuas iha loron 01 fulan abril tinan 2020. Maibé liu tiha semana ida mak ha’u sente isin-manas no kustupadu ka inus-metin. Hafoin, iha dadeersan ida, Pesoál Saùde sira fó konsulta no hasai hau-nia amostra hosi inus no ibun. Entaun, pesoál saúde sira deteta katak ha’u pozitivu ba moras COVID-19. Iha kalan ne’e kedas, iha loron 09 fulan 2020, ha’u tama iha fatin izolamentu Vera Crus hodi halo tratamentu intensivu.

Ohin, sábadu (16 maiu 2020) lorokraik, ha’u hamriik iha ita-boot sira-nia oin, iha fatin ida-ne’e (Sentru Konvensaun Dili). Ha’u nu’udar timoroan ne’ebé segundu kazu konfirmadu COVID-19 iha Timor-Leste.

Uluk nia-na’in, ha’u agradese ba Aman Laran Luak (Maromak) mai ha’u, nune’e ohin loron ha’u bele ultrapasa no rekupera ba moras COVID-19 ne’e.

Iha fatin izolamentu Vera Crus, iha fulan ida no semana ida-nia laran, ha’u hamutuk ho kolega na’in-23 ho kazu konfirmadu baixa iha fatin izolamentu Vera Crus. Ohin loron, ha’u hasoru doutór no doutora sira, infermeira no infermeiru oin-oin.

Ekipa hosi laboratóriu mós sei bosan ho ha’u iha Vera Crus, tanba kada loron rua, sira sempre hasai kaben-tasak (kap) hosi hau-nia inus no ibun.

Hosi loron ba loron, kolega barak mak iha mudansa fila-fali, hodi alta no ba sira-nia uma no hasoru sira-nia família. Ha’u mak nafatin [pozitivu COVID-19] iha Vera Crus. Iha ne’ebá, buat barak mak ha’u hasoru. Ha’u triste. Fuan taridu. Tauk no dalaruma toba ladukur. Sente mesak no lagosta atu han.

Maibé, ha’u agradese ba doutór no doutora sira, ba infermeira no infermeiru sira, no ekipa pesoál saúde ne’ebé servisu iha fatin ne’ebá, hodi fó tulun no ajuda ona ha’u, to’o ohin loron, ha’u ultrapasa no hetan isin di’ak fila fali.

Ha’u hakarak hato’o agradese wa’in ba Ita hotu liuliu ba grupu ida agora daudaun liuhosi sira mak ha’u hatene no rekoñse hau-nia frakeza sira iha Maromak nia oin. No, ha’u bele hatene oinsá pasiésia hodi simu Maromak nia liafuan hodi haforsa ha’u durante ne’e, iha situasaun krize ba hau-nia aan rasik.

Ita Timor-Leste ne’e, dehan moras sintoma ne’e sira hanoin moras baibain hela no balun lafiar. Maibé, ita haksesuk malu mós sente ladi’ak. Ha’u moras hanesan ne’e mak hetan pozitivu COVID-19.

Ha’u husu ba povu Timor-Leste labele pániku. Maibé, ita rasik mak prevene de’it, tuir ita-nia Ministériu Saùde katak uza máskara, kumpre distánsia sosiál no fase liman ho sabaun loro-loron. Obrigadu wa’in ba ita hotu..!

Notísia Relevante: TL Kazu Ativu COVID-19 Zero, Profisionál Saúde Na’in-11 Submete ba Kuarentena

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here