Intelektuál Marobo- oan, Armindo Maia ho ekipa SS-CIGC entrega apoia nesesidade báziku ba populasaun sira iha Marobo, Munisípiu Bobonaro, sábadu (06/05/2020). Imajen/Eugénio Pereira

MAROBO, 16 maiu 2020 (TATOLI) – Kamada intelektuál Marobo-oan, Munisípiu Bobonaro, kolabora ho Ekipa Sala Situasaun Sentru Integradu Jestaun Krize (SS-CIGC, sigla portugés), sábadu (16/05/2020), halo asaun karidade hodi fó apoia nesesidade báziku ba komunidade Marobo, kompostu husi Suku Atu-Aben, Soileco ho Ilat-Laun.

Entrega apoia solidariedade ba populasaun Marobo, Bobonaro, sábadu (06/05/2020). Imajen/Eugénio Pereira

Apoia ne’e entrega direita husi kamada intelektuál Marobo-oan, Armindo Maia, nu’udar mós eis Ministru Edukasaun, ne’ebé akompaña husi Adjuntu Estadu Maiór Koordenadór Konjuntu SS-CIGC, João da Costa Esteves, Diretór Rekursu Umanu Polísia Nasionál Timor-Leste (PNTL), Superintendente, Emilio do Santos, Komandante Seksaun Seguransa CIGC Superintendente Antonino Mauluta, Komandante Seksaun Operasaun CIGC, Superintendente Moises Amaral, ne’ebé  simu direita husi Xefe Suku Atu-Aben, Januário Fernandes ho komunidade sira.

Oferta  nesesidade báziku hirak-ne’e hanesan, foos saka 50, manu tolun kaixa haat, bebida Dellos kaixa lima (5) ne’ebé fó apoiu ba komunidade kbiit laek na’in 47 husi Suku Atu-Aben na’in-20, Soilesu  (21) ho Ilat-Laun na’in-neen (6).

Armindo Maia dehan, apoiu fó husi Marobo-oan, atuál membru Parlamentu Nasionál husi Bankada CNRT, Merry Barreto, Ministra Edukasaun, Delce de Jesus, ho, José Gonçalves

“Ha’u hanesan Marobo-oan serbisu hamutuk ho Marobo-oan sira tau osan sosa foos saka 50 hodi ajuda ita-nia komunidade ne’ebé hetan apoia transporte husi SS-CIGC,” esklarese Armindo Maia.

Armindo mós hato’o agradese tanba ekipa SS-CIGC mós fó apoiu sasán hanesan, bebida, manu-tolun kaixa haat.

Iha fatin hanesan, Xefe Suku Atu-Aben, Januário Fernandes, Xefe Suku Ilat-Launt, Juvenal Pires Amaral ho Xefe Suku Soileco, Norberto Martins, hato’o agradese ba apoiu ne’e hodi tulun povu kbiit laek sira iha situasaun Estadu Emerjénsia.

“Apoiu ne’e ami sei fó direita ba povu kbiit laek sira ne’ebé ami suku tolu identifika ona,” Xefe Suku Atu-Aben, Januário Fernandes  hateten.

Komandante Seksaun Seguransa CIGC, Superintendente Antonino Mauluta, apela ba populasaun Marobo atu kontinua koopera ho ekipa Ministériu Saúde no Autoridade Seguransa hodi mantein dixiplina no kumpre regra Estadu Emerjénsia.

 Nia dehan, Bobonaro nu’udar sentru fronteira ne’ebé baliza ho Atambua-Indonézia mós agora hametin lutu seguransa hodi evita komunidade halo viajen ba-mai para evita propagasaun  surtu COVID-19.

Daudaun ne’e ekipa PNTL ho F-FDTL kontinua halo seguransa másima hodi kontrola movimentu transporte bele la’o ba mai, maibé kumpre regra distánsia sosiál no distánsia fíziku inklui fase-liman beibeik.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here