Imajen Mídia PR.

DILI, 16 maiu 2020 (TATOLI)–Espoza Prezidente Repúblika Cidália Nobre Lopes Mouzinho Guterres liuhosi Gabinete Apoiu Atividade Conjuje Prezidensia Republika (GAAC-PR) no Fundasaun SADIA, oferese nesesidade báziku ba komunidade kbiit laek uma kain 25 iha Aldeia Akanunu, Mota Kiik no Hali-Dollar, Suku Hera, Postu Administrativu Cristo Rei, Munisípiu Dili.

Hafoin oferese nesesidade báziku ba kbiit laek sira, Espoza Prezidente Repúblika  agradese ba entidade timoroan hotu ne’ebé durante ne’e halo asaun karidade ka solidaridade hodi tulun komunidade kbiit laek sira iha situasaun difisil ida-ne’e, hanesan lasu amizade entre sidadaun sira iha momentu iha ita-nia rain hasoru hela situasaun difisil.

Cidália hateten, iha tinan ida-ne’e, Timor-Leste hasoru dezastre naturais hanesan inundasaun lori komunidade barak mak sai vítima, alende ne’e surtu mundial ka COVID-19 ne’ebé halo komunidade barak la hala’o atividade, implika tebes ba sira-nia moris, liuliu han no hemu loro-loron nian.

Tanba ne’e, nia dehan, GAAC-PR no Fundasaun SADIA servisu hamutuk ho autoridade lokál no veterana balun rekolla dadus família kbiit laek sira hodi hetan tulun no hakmaan netik sira-nia nesesidade loron-loron.

“Situasaun agora presiza ita lolo-liman ba malu nafatin, hosi viziñu ba viziñu, sira ne’ebé iha kbiit, apoiu netik maun-alin sira ne’ebé laiha kbiit. Tanba ne’e, ita-nia asaun karidade no asaun solidaridade hosi maluk timoroan, organizasaun ka individu ba família kbiit laek. Atu nune’e, hotu-hotu iha sentidu hanesan ba situasaun ida agora ita hasoru,” Cidália hateten.

Inan nasaun ne’e, husu ba autoridade lokál atu identifika nia komunidade sira ne’ebé vulneravel tanba Gabinete iha planu sei apoiu mós komunidade sira ne’ebé afeta ba mudansa klimátika.

“GAAC-PR no Fundasaun SADIA nia programa prioridade liu mak apoiu sosiál ka asaun karidade ba komunidade ka organizasaun kbiit laek ne’ebé moris difisil tebes no presiza atu hetan tulun,”  nia hatutan.

Entretantu, durante tempu COVID-19, GAAC-PR fó ona apoiu nesesidade baziku ba uma-kain família 120 hodi servisu hamutuk ho organizasaun juventude, autoridade lokál no kongregasaun sira. Alende ne’e, dadus ne’ebé gabinete sei apoiu tan komunidade kbiit laek hamutuk uma-kain 110.

Iha fatin hanesan, família Kbiit laek ne’ebé simu nesesidade báziku ne’e, Maria Elizia Correia, sente kontente tebes ba apoiu ne’e tanba foin ba dahuluk nia parte hetan apoiu hosi gabinete Espoza Prezidente Repúblika.

“Ami kontente tebes tanba espoza prezidente repúblika apoia ami komunidade Hera. Situasaun COVID-19 halo ami la sai ba liur hodi halo netik servisu oan ruma. Tanba ne’e fó mai ona, ami simu ho liman rua,” Maria Elizia Correia espresso ninia sentimentu ksolok.

Entretantu, informasaun hosi parte autoridade lokál katak komunidade iha Suku Hera maioria moris ho faan ai-maran, buka moris iha tasi hanesan peska no hortikultura.

Jornalista : Cipriano Colo

Editór       : Cancio Ximenes

 

HAKEREK NO HATÁN

Please enter your comment!
Please enter your name here