Prezidente Autoridade Munisípiu Manufahi, Arantes Isaac Sarmento. Imajen/Egas Cristovão

MANUFAHI, 16 maiu 2020 (TATOLI)-Koordenadór ba Komisaun Prevensaun COVID-19 Munisípiu Manufahi, Arantes Isaak Sarmento, kontinua alerta ba komunidade atu prevene an husi transmisaun surtu Coronavirus maski dadaun ne’e Timor-Leste laiha ona kazu konfirmadu.

“Munisípiu Manufahi kontinua alerta nafatin ba komunidade sira, liu husi Administradór Postu no Xefe Suku sira, hodi bele prevene an husi moras Coronavirus ne’ebé mak tama iha Timor hanesan moras ida ne’ebé mak afeta ona iha mundu ne’e,” dehan Atuál Administradór Munisípiu Manufahi, iha salaun administrasaun Manufahi, sábadu (16/05/2020).

Nia informa liután katak, daudaun ne’e nia parte kumpre ona orientasaun husi Primeiru-Ministru, Taur Matan Ruak hodi re-ativa operasaun transporte públiku no bazár iha Manufahi, maibé tenki kumpre regra sira hanesan mantein distánsia sosiál, fizíku, uja maskra no seluk tan.

“Iha estadu emerjénsia ba dahuluk, ema hotu-hotu kumprie no ladun iha movimentasaun, ida ne’e fó impaktu ba iha parte ekonomia maibé la’ós ba iha seguransa alimentár,”nia hateten.

Atu evita no prevene transmisaun surtu virus ne’e iha Manufahi, Komisaun Prevensaun COVID-19 kontinua halo sensibilizasaun informasaun ba komunidade no dezinfekta ba fatin públiku.

“Komisaun COVID-19 komesa estabelese ona postu provizóriu balun iha dalan protokólu hodi bele halo dezinfekta ba transporte públiku no prepara mós fasilidade hanesan fase liman iha fatin públiku, liliu iha bazár ka merkadu, sentru saúde no mós iha fatin turizmu ninian ne’ebé ema barak ba vizita atu bele fase liman beibeik,” tenik Arantes.

Munisípiu Manufahi to’o oras ne’e seidauk iha kazu konfirmadu COVID-19 maski foinlalais iha pasiente rua ho sintoma COVID-19 maibé rejultadu teste laboratóriu fó sai negativu.

Jornalista : Hortencio Sanchez

Editór      : Agapito dos Santos

HAKEREK NO HATÁN

Please enter your comment!
Please enter your name here