Xefe Suku Camea, Matos da Costa. Foto TATOLI: Felicidade Ximenes

DILI, 15 maiu 2020 (TATOLI)–Xefe Suku Camea, Matos da Costa, rejeita halo kobransa ilegál ba komunidade sira iha Suku Camea, Postu Administrativu Cristu Rei, Munisípiu Dili, bainhira halibur dadus no trata fixa família ba komunidade sira ne’ebé atu simu subsídiu $100 kada uma-kain hosi Governu Timor-Leste.

Nia hatutan, informasaun ne’ebé mak Provedoria Direitu Umanu no Justisa (PDHJ) relata katak autoridade suku neen (6) inklui Suku Camea halo kobransa illegal ba komunidade sira ne’e, la loos.

“Ha’u rejeita infromasaun ne’e. Karik aktu ne’ebé mak ami halo, ami sei responsabiza, Maibé ami nunka halo kobransa ilegál relasiona ho fixa família. Ohin, ami mai konfirma ona PDHJ maibé informasaun ne’e la’ós kobransa ilegál maibé má administrasaun,” dehan Xefe Suku Camea, Matos da Costa, ba Ajénsia TATOLI liuhosi entrevista iha Edifisiu PDHJ, Caicoli, Dili.

Nia hatutan, maski informasaun ne’ebé PDHJ fó sai katak Suku Camea oferese fixa família la tuir regra, tanba ne’e iha komunidade balu la satisfeitu entaun mai keixa iha PDHJ maibé Suku Camea la involve ba kobransa ilegál.

“Tuir loloos Governu mak prepara blanku fixa família ba komunidade maibé mosu impase polítika, ita-nia Orsamentu Jerál Estadu la pasa no situasaun Governu agora mosu tan moras COVID-19, entaun Governu labele prodús blanku,” nia hateten.

Durante ne’e, nia dehan, Suku Camea lafó orientasaun ba Xefe Aldeia atu halo atividade kobransa ne’ebé liga ba subsídiu hosi Governu.

“Ita-nia blanku fixa família provizóriamente laiha tanba ne’e ita fó orientasaun ba ita-nia komunidade sira atu hetan fixa família iha rental depois mak sira prenxe ho sira-nia membru família, xefe aldeia, Xefe Suku no Postu Administrativu asina. Hafoin entrega ba Munisípiu nune’e sira bele hein programa ida ba subsídiu iha Estadu Emerjénsia ba COVID-19 nian,” nia hateten.

Komunidade balu, tuir nia, ne’ebé hakarak fó osan $0.50  ka $1.00 ba xefe aldeia sira atu trata sira-nia fixa família tanba sira rasik hakarak tuur de’it iha uma no lakohi la’o hodi trata sira-nia dokumentu sira ne’e.

“Sira lakohi la’o, sira hakarak xefe aldeia sira mak trata sira-nia dokumentus sira. Ida ne’e mak durante akontese iha Suku Camea. Maibé dehan halo kobransa ba $5-25 ne’e nunka akontese iha Suku Camea,” nia esplika.

Xefe suku ne’e rekomenda katak komunidade sira ne’ebé la satisfeitu, iha direitu tomak bele keixa maibé tenke informa no hato’o informasaun ne’ebé loos no momoos.

“Ita lasimu orientasaun hosi Ministériu kompetente atu halo kobransa. Maibé balu ne’ebé sente katak suku fó kobransa ba sira, sira iha direitu tomak bele keixa maibé keisa buat ne’ebé loos,” nia sujere.

Notísia Relevante: PDHJ Deskobre Autoridade Suku Neen Halo Kobransa ba Komunidade

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here