Sergio Lobo, Membru Governu ida ne'ebé sai testamuña ba kazu ró ambulansia,. Imajen/Egas Cristovao

DILI, 15 maiu 2020 (TATOLI)-Portavóz Sentru Integradu Jestaun Krize (CIGC-sigla portugés), Sergio Lobo informa daudaun ne’e laiha ona pasiente konfirmadu no provável surtu COVID-19 maka sei izola iha Sentru Saúde Vera Cruz Dili tanba rekupera hotu ona.

Eis Ministru Saúde ne’e relata ema ne’ebé maka submete ba teste laboratóriu hamutuk 1.314, hein rezultadu 435, rezultadu negativu hamutuk abitante 855, kazu konfirmadu foun 0, kazu konfirmadu 24, númeru rekuperadu kompostu husi konfirmadu 24 no provável haat, hamutuk kazu 28.

“Ita agora laiha tan ona pasiente iha Vera Cruz,”deklara Sergio Lobo ba jornalista sira durante konferénsia imprensa iha CCD, Merkadu-Lama Dili, ohin.

Abitante sira ne’ebé maka oras ne’e sei hela iha kuarentena obrigatóriu hamutuk 41, husi Dili 37 no Munisípiu na’in haat, auto-kuarentena iha Dili hamutuk ema na’in tolu, maibé Munisípiu laiha.

No sira ne’ebé maka pasa ona loron 14 hamutuk ema na’in 2.238, husi Dili 1.738 no Munisípiu hamutuk ema 500.

Maski laiha ona kazu konfirmadu surtu COVID-19 iha fatin izolamentu, maibé Eis Governante ne’e hateten ekipa vijilánsia sentinela kontinua esforsu hodi rejista pasiente ho sintoma COVID-19 iha territoriu Timor-Leste.

CIGC mós fó rezultadu provizóriu husi implementasaun programa triazen no vijilánsia sentinela hatudu seidauk iha kazu transmisaun lokal surtu coronavirus iha komunidade nia le’et.

Tanba ne’e, Portavóz CIGC ne’e kontinua apela ba komunidade hodi koopera ho ekipa vijilánsia epidemiolójika atu foti amostra bainhira mosu sintoma COVID-19 iha komunidade nia le’et.

“Husu ba komunidade sira atu kontinua kumpre regra distánsia fizíku no distaánsia sosiál minimu metru ida, tuur hakmatek iha uma, evita halibur malu, uja maskra wainhira sai husi uma, kontinua pratika ijiéne pesoál, evita liman kona matan inus no ibun bainhira seidauk fase liman,”tenik Sergio Lobo.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here