DILI, 15 maiu 2020 (TATOLI) – PERTAMINA Internasionál iha Timor-Leste hamutuk ho Embaixada Indonézia iha Timor-Leste (KBRI, sigla Indonézia) entrega ekipamentu prevensaum COVID-19 ba Sentru Integradu Jestaun Krize (CIGC, sigla portugés).

Apoia sira ne’ebé oferese husi PERTAMINA maka hanesan termo scan rua no máskara hamutuk 100 ba Polisía Nasionál Timor-Leste (PNTL) no 100 ba FALINTIL-Forsa Defeza Timor-Leste (FDTL) ne’ebé hala’o kna’ar iha CIGC.

Aleinde ne’e mós apoia tangki tau bee haat, kompleta ho fasilidade fase liman.

“Ami mai iha Sentru Integradu Jestaun Krize hodi entrega tangki bee hodi fase liman, máskara, no termo scan. Apoiu ida-ne’e nu’udar esforsu ami-nia hamutuk ho Governu Timor-Leste no entidade sira seluk hanesan Organizasaun Mundiál Saúde (OMS) hodi halo prevensaun COVID-19 iha Timor-Leste”, hateten Embaixadór Indonézia iha Timor-Leste, Sahat Sitorus hafoin entrega ekipamentu ba CIGC, iha Sentru Konvensaun Dili (CCD, sigla portugés), sesta ne’e.

Diplomata ne’e apresia tebes ho esforsu Governu nian hodi halo prevensaun ba surtu COVID-19 iha Timor-Leste.

“Ha’u apresia tebes no hato’o agradese ba Governu Timor-Leste tanba esforsu maka’as no prevene moras COVID-19 husi populasaun no mós ami hotu ne’ebé hela iha Timór. Ami haree profisionál saúde sira fó atendimentu di’ak tebes, nune’e mós PNTL, Forsa no politíku sira ne’ebé mak halo esforsu maka’as hodi halakon lalais COVID-19 iha Timor-Leste”, nia salienta.

Nune’e, nia iha esperansa katak Timor-Leste la rejista tan kazu foun.

Sorin seluk, Diretór Ezekutivu PERTAMINA International Timor,SA, Beny Harto Wijaya, hateten inisiativa husi apoia ne’ebé PERTAMINA hamutuk KBRI entrega ba CIGC, ho objetivu hakarak ajuda programa prevensaun husi OMS no Governu Timor-Leste.

“Espera katak ho apoia sira ne’ebé ami oferese bele halo prevensaun di’ak liután ba COVID-19 iha Timor-Leste no ami espera mós katak maski COVID-19 laiha ona iha ne’e, maibé populasaun presiza kontinua uza máskara no fase liman bebeik”, nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here