Xefe Sentru Saúde Internamentu Ainaro, Arquimenio Orlean de Araújo. Imajen/ Egas Cristovão

AINARO, 15 maiu 2020 (TATOLI)-Xefe Sentru Saúde Ainaro Vila, Arquimenio Orleans Araújo, hateten durante implementasaun programa triazen no vijilánsia sentinela konsege foti ona sampel husi pasiente ema na’in 20 tanba mosu sintoma surtu Coronavirus.

Tuir nia pasiente sira ne’e mai konsulta ho problema infesaun respiratóriu aguda tanba ne’e presiza foti amostra hodi halo teste laboratóriu para deteta sira konfirmadu COVID-19 ka lae.

“Rekollamentu amostra sira ne’e hahú iha segunda liubá ohin termina kedan amostra 20 ami tenke manda kedan ba laboratóriu nasionál hodi halo teste,” dehan Xefe Sentru Saúde Ainaro Vila ba Jornalista sira iha Ainaro, sesta (15/05/2020).

Husi amostra ema na’in 20 ne’e, abitante na’in ualu antes ne’e kumpre ona kuarentena obrigatóriu iha Dili no foin maka re-integra ba sira-nia família.

“Ita iha suku hitu no postu saúde lima mak funsiona, maibé distánsia ne’e do’ok, suku rua ba konsulta de’it iha postu saúde no suku haat mak mai konsulta iha sentru saúde Ainaro tanba besik, maibé ita nafatin kontrola ho másimu,” nia dehan.

Sentru Saúde Ainaro iha funsionáriu hamutuk ema na’in 43, kompostu husi médiku na’in sia, enfermeiru na’in lima, parteira na’in 10, no funsionáriu administrasaun.

Jornista : Hortencio Sanchez

Editór    : Agapito dos Santos

HAKEREK NO HATÁN

Please enter your comment!
Please enter your name here