Prezidente Konsellu Administrasaun Institutu Nasionál Seguransa Sosiál (INSS), Longuinhos Armando. Imajen Tatoli/Osória Marques.

DILI, 14 maiu 2020 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longuinhos Armando, husu ba traballadór sira liuliu ba kondutór transporte públiku sira labele aproveita situasaun agora mak mai rejistu maibé iha situasaun normál mós bele rejistu hodi bele involve-aan iha Seguransa Sosiál (SS) atu asegura futuru.

“Ita hanoin sira-nia futuru tanba sira mós traballadór ida bainhira hetan dezastre ruma oinsáa mak sira bele hetan subsídiu hosi Governu. Tanba ne’e, labele hanoin subsídiu fulan rua nian. Maibé bainhira situasaun normál tenke rejistu iha seguransa sosiál nune’e bele proteje no asegura imi iha futuru,” dehan Longuinhos Armando ba Ajénsia TATOLI iha nia knar fatin, Caicoli, Dili, foin lalais ne’e.

Tuir nia, traballadór ida mak rejistu ona iha seguransa sosiál mak bainhira nia idade tama terseira idade ona, nia sei hetan subsídiu hosi Governu maski lahalo serbisu.

“Tanba ne’e, tenke asegura aan ona iha seguransa sosiál para bele hetan subsídiu hosi Governu bainhira idade katuas ona,” nia hateten.

Tanba ne’e, nia prefere ba traballadór sira hanesan kondutór transporte públiku sira tenke kria asosiasaun ida para fasil halo rejistu iha seguransa sosiál.

“Ho ida ne’e ha’u prefere ba kondutór transporte públiku sira ne’ebé tula pasajeiru hanesan bemo, taxi no angguna atu di’ak liu kria asosiasaun ida, para ida de’it mak bele mai rejistu no jere iha seguransa sosiál. Nune’e, fasil tanba agora ita Estadu Emerjénsia ba COVID-19,” nia dehan.

Longuinhos Armando kanitnua alerta ba traballadór hotu-hotu ne’ebé hala’o atividade tenke kria konta bankária no mós rejistu iha Institutu Nasionál Seguransa Sosiál (INSS).

“Kualker atividade hotu-hotu tenke liuhusi konta bankária tanba ita hatene katak agora moras Covid-19 no traballadór sira mós tenke rejistu an ona iha Seguransa Sosiál nune’e futuru mak kontribui mak Governu liuhusi Seguransa Sosiál selu,” nia hateten.

Nia informa, kritériu ne’ebé mak atu rejistu mak traballadór tenke lori Karta Kondusaun (SIM) motorista, STNK, Kartaun Eleitorál no seluk tan.

Notísia Relevante: Kondutór Transporte Públiku 6000-Resin Sei Hetan Subsidiu hosi Governu

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here