Embaixadór Xina mai Timor-Leste, Xiao Jiaguo ho Ministru Defeza no Ministru Interior Interinu, Filomeno da Paixão de Jesus, halo enkontru iha Ministériu Defeza no Seguransa, Fatuhada, Dili. Imajen/Mídia MI

DILI, 15 maiu 2020 (TATOLI) – Governu Repúblika Popular Xina, liuhusi sira-nia embaixada iha Dili, Timor-Leste  (TL) hato’o ona sira-nia prontidaun ba Governu TL liuhusi Ministru Defeza no Ministru Interior interinu,  Filomeno da Paixão de Jesus, atu apoia ekipamentu protesaun no médiku nian mai Polísia Nasionál Timor-Leste (PNTL) hodi kontribui serbisu prevensaun surtu Coronavirus ka COVID-19.

Notísia Relevante : Xina Prontu Apoiu TL Kombate Coronavirus

Ministru Defeza no Ministru Interior Interinu, Filomeno da Paixão de Jesus, akompaña husi Embaixadór Xina mai Timor-Leste, Xiao Jiaguo, halo klarifikasaun ba jornalista-sira kona-ba sira-nia sorumutuk iha Ministériu Defeza no Seguransa, Fatuhada, Dili. Imajen/Mídia MI

Liuhusi enkontru kortezia entre delegasaun Embaixada Xina iha Timor-Leste  ho Ministru Filomeno da Paixão de Jesus iha Ministériu Defeza no Seguransa, Dili, Embaixadór  Xiao Jiaguo, relata katak, material doasaun hirak-ne’e, Governu Xina apoiu ba Timor-Leste, liuhusi kooperasaun bilateral nasaun-rua nian nomos hanesan nasaun parseria ne’ebé hahú ona apoiu malu dezde tinan 2001.

Apoia ne’e, tuir Embaixadór  Xiao Jiaguo, katak, entre fulan maiu ka juñu, tinan ne’e, sei to’o iha Dili, Timor-Leste.

“Ha’u mai vizita Ministru Interior no Ministru Defeza atu informa apoiu hodi halo doasaun balu ba Governu Timor-Leste liuhusi Ministériu Defeza no mós Ministériu Interiór atu reforsa serbisu koletiva luta kontra propagasaun COVID-19,” esklarese Embaixadór Xiao Jiaguo, liuhusi komunikadu imprensa ne’ebé ajénsia Tatoli asesu, sesta (15/05/2020).

Ekipamentu hirak-ne’e mak hanesan fardamentu ba PNTL ho modelu hanesan kapa, disposable medical mask, surgical mask, protective mask, protective google, protective face shield, protective coveralls, protective waterproof coveralls, shoe covers, non-toucable temperature detector nomos medical gloves, hodi apoiu PNTL ba serbisu prevensaun COVID 19 iha Timor-Leste.

Embaixadór Xiao Jiaguo  hatutan, Governu Xina kontinua afirma nia prontidaun atu apoia nafatin governu Timor-Leste iha prosesu dezenvolvimentu nasionál no esforsu governu nian luta kontra COVID-19.

Ministru Defeza no Ministru Interior Interinu, Filomeno da Paixão de Jesus, agradese apoiu husi Governu no Povu Xina ne’ebé ajuda tebes PNTL ho mós F-FDTL ba iha prevensaun surtu  COVID-19.

“Ida-ne’e ita bele dehan doasaun ida espesiál ba iha ita, tanba ohin ko’alia mós kona-ba atu harii ospitál amizade entre Governu Popular Xina ho Timor-Leste iha futuru. Ospitál ne’e, sei halo uma-rua no kada uma iha andár tolu. Uma ida sei tau espesialista sira hodi halo atendimentu ba ema ne’ebé moras no uma ida sei halo hodi simu ema moras sira,” hateten Ministru Filomeno Paixão.

Ministru Filomeno Paixão lori Governu Timor-Leste nia naran, hato’o agradesimentu ba suporta ne’ebé Governu no povu Xina fó mai Timor-Leste nia PNTL no mós F-FDTL.

Jornalista           : Nelson de Sousa

Editór                 : Francisco Simões

HAKEREK NO HATÁN

Please enter your comment!
Please enter your name here