Imajen Tatoli/Osória Marques.

Ha’u iha ne’e halai ba-mai de’it. Bainhira haree karreta ka motor ruma para iha ha’u-nia oin, ha’u tenke halai lalais ba hodi hasee ema atu sosa. Ha’u labele hamriik metin iha fatin. Ha’u tenke isin-moris, moris no book-aan. Ha’u la tauk bolu no hasee ema atu sosa, tanba osan ne’e.

DILI, 15 maiu 2020 (TATOLI)—Bandeira Repúblika Demokratika Timor-Leste (RDTL) daudaun ne’e hahú semo hikas iha anin leten. Baibain bandeira tali be korente ne’e semo iha ai-riin sira be harii iha instituisaun estadu nia oin maibé agora bandeira lulik ne’e hahu semo aas iha komunidade nia uma leten sira-ne’e ho liberdade.

Bandeira ho kór mean, kinur, metan, ho fitun-mutin ida tuur iha klaran ne’e, semo aas iha kalohan nakukun ida-nia klaran. Kalohan-nakukun “COVID-19” no “Estadu Emerjénsia” falun metin hela rai-lulik Timor-Leste nia matan (ibun no inus) hanesan nia emar sira ne’ebé daudaun ne’e la’o ba-mai taka hela máskara iha nia ibun no inus atu bele livre hosi moras COVID-19.

Maski Timor-Leste nia ibun no inus, oras ne’e, taka metin ho máskara “COVID-19”, “Estadu Emerjénsia”, no máskara “Impase Polítika” nian maibé Timor-Leste nia “liman-ain” (emar/populasaun) sira, maski taka máskara, sira hahú halibur malu hodi hakonu Sidade Dili hanesan bandeira RDTL ne’ebé anin huu no semo livre baku ba-mai de’it.

Iha populasaun wa’in be la’o namkari iha Sidade Dili nia laran ne’e, iha labarik-feto balu mak sikat-leet, hodi buka moris. Maski propagasaun surtu COVID-19 nani nafatin maibé labarik feto na’in rua ne’e la tauk COVID-19 no la hakruuk ba regra Estadu Emerjénsia hodi hadau moris ho faan bandeira RDTL nian.

Tanba, labarik feto na’in rua ne’e hatene no konsiente katak, loron boot nasionál ba komemorasaun Loron Restaurasaun Independénsia Timor-Leste ne’ebé monu iha 20 maiu 2020 ne’e, estadu Timor-Leste sei la komemora. No, populasaun wa’in sei la sente loron boot ne’e nia kmanek iha Estadu Emerjénsia nia laran ne’e, entaun labarik feto na’in-rua fó hanoin ba timoroan sira liuhosi faan bandeira RDTL iha dalan ninin.

“Maski Timor-Leste afeta ho moras Coronavirus maibé ami gosta faan bandeira RDTL nian. Agora fulan maiu ne’e loron restaurasaun independensia Timor-Leste nian, nune’e ami faan bandeira RDTL para ema ne’ebé presiza karik bele sosa. Loron boot ne’ebé ami hakarak faan atu hetan osan. Maski ami tauk moras Coronavirus maibé ami hakarak faan para hetan osan hodi bele sosa kadernu, lapijeira, pasta no mós bele selu eskola, karik ema sosa barak,” dehan labarik feto, Lucia Mendonça, ba Ajénsia TATOLI iha Portu Dili nia oin.

Imajen Tatoli/Osória Marques.

Ho haraik-aan, labarik feto ne’e haktuir, iha loron rua nia laran ne’e nia faan bandeira RDTL ho medida ki’ik (natón) ne’e, nia bele hetan rendimentu $20 to’o $30 hosi rezultadu faan bandeira refere.

“Ha’u kontente tebes bainhira faan bandeira tanba ema sosa barak. Maske ha’u faan bandeira ho medida ki’ik-oan ho presu $1.00 maibé folin tebes. Ohin, ema seidauk sosa barak maibé ha’u agradese ona tanba bele hetan osan natón hodi rai,” nia dehan.

Ba nia, loron ida tomak make ma sosa to’o hetan $25 ne’e hanesan sorte ida tanba nia bele hetan rendeimentu natón no bele hetan osan-inan nia-funan lubun ida, tanba kanda bandeira ne’ebé nia sosa iha loja sira ho folin sentavus $25 de’it.

“Ami ba sosa bandeira iha loja sira, bandeira ida ho folin sentavus $25 de’it. Entaun, ami mai faan ne’e bandeira kesak ida faan ba folin $1.00,” labarik feto ne’e haktuir ho laran ksolok.

Imajen Tatoli/Osória Marques.

Maski loron manas no tauk moras Coronavirus, Lucia Mendonça ho nia kolega ne’e, la sente kolen no la sente kosar, sira halai tun-sa’e iha loron-manas nia laran, hodi buka moris iha dalan ninin atu hatutan sira-nia moris liuhosi faan bandeira RDTL.

“Ha’u iha ne’e halai ba-mai de’it. Bainhira haree karreta ka motor ruma para iha ha’u-nia oin, ha’u tenke halai lalais ba hodi hasee ema atu sosa. Ha’u labele hamriik metin iha fatin. Ha’u tenke isin-moris, moris no book-aan. Ha’u la tauk bolu no hasee ema atu sosa, tanba osan ne’e,” nia dehan ho matanfuan lakan.

Iha fatin diferensa, negosiante ida hosi Indonézia, Saripudin, mós tara bandeira RDTL iha tali rafia be dada iha dalan ninin (Kampung Alor), hatete nia faan bandeira Timor-Leste tanba loron restaurasaun independensia Timor-Leste nian besik ona.

“Ha’u faan bandeira iha ne’e atu sustenta moris no karik iha kolega balun presiza ha’u bele ajuda sira. Ha’u hatene moras COVID-19 iha Timor-Leste ne’e ladún grave, tanba Estadu no Governu Timor Leste esforsu tebes ba nia komunidade hodi kombate no taka fronteira, portu no aeroportu, nune’e ha’u latauk atu faan maibé tenke uza máskara,” nia dehan.

Bainhira ema la sosa, nia haktiir, labele dehan atu ajuda kolega ka belun ruma tanba ne’e osan nia folin. Nia dehan, rezultadu faan ba loron ohin nian, seidauk sosa barak maibé bele hetan netik osan $10 ka $20.

Tanba, tuir Saripudin, loron boot nasional hanesan 20 maiu ne’e ema barak mak faan entaun dalaruma bandeira RDTL bele folin no dalaruma la folin liu. Tanba ema barak mak faan no tanba nesesidade mak obriga nune’e atu dehan folin ka la’e ne’e, la’ós kestaun.

Imajen Tatoli/Osória Marques.

“Folin ka la’e, ida ne’e la’ós kestaun ba ita. Tanba ema barak mak faan bandeira. Bainhira ema sosa ona entaun ita bele uza ba nesesidade loro-loron nian,” nia hateten.

Entretantu, negosiante labarik-mane, David Martins, hanesan estudante ida iha Eskola sekundárua 4 Setembru Unamet Balide, Dili, hateten katak aproveita ho situasaun agora ne’ebé eskola hotu ferias, nia kreativu hodi hakarak faan bandeira atu sustenta nia nesesidade uma laran no mós bele sosa ekipamentu eskola nian.

“Ha’u hakarak faan tanba Estadu Emerjénsia ita laeskola di’ak liu faan para hetan osan. Bainhira eskola tama fali, osan labarak maibé natón ona ba ita-nia nesesidade loron-loron nian no ba sasán eskola nian,” nia dehan.

Atividade labarik feto sira faan bandeira RDTL iha Dili laran ne’e, hanesan imajen ida hosi labarik sira seluk ne’ebé brani no kreativu tebes hodi buka moris iha situasaun Estadu Emerjénsia no iha bandeira “COVID-19” nia mahon okos bá.

Iha situasaun labarik balun lockdown iha uma, sira la tauk hodi hadau osan dolár liuhosi dalan kreativu hodi habiban atividade faan bandeira RDTL ba sira-nia aan rasik. Maski, dalaruma sira hatene katak Loron Restaurasaun Independénsia 20 Maiu ne’e sei la komemora maibé sira só fó kór de’it ba loron boot ne’e, liuhosi faan no foti sa’e bandeira RDTL dalan ninin.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here