Embaixadór Indonézia iha Timor-Leste, Sahat Sitorus. Imajen/Sahat Sitorus

DILI, 15 maiu 2020 (TATOLI) – Embaixadór Indonézia iha Timor-Leste, Sahat Sitorus, konsidera atendimentu moras COVID-19 iha Timor-Leste di’ak tanba pasiente konfirmadu daudaun ne’e rekuperadu hotu ona.

Hafoin Ministériu Saúde deklara Timor-Leste rejista kazu pozitivu COVID-19 dahuluk iha loron 21 marsu, totál kazu ne’ebé rejista hamutuk na’in-24 no ohin loron rekuperadu hotu.

“Ha’u konsidera Timor-Leste nia atendimentu ba kazu COVID-19 ne’e di’ak liu, tanba husi kazu 24 ne’e di’ak hotu ona. Obrigada ba doutór no médiku sira, Governu no nasaun sira ne’ebé maka ajuda ona. Ha’u hanoin ida-ne’e kooperasaun ne’ebé di’ak no presiza kontinua tan”, dehan diplomata ne’e hafoin akompaña sidadaun Indonézia hamutuk na’in-149 repatria husi Timor-Leste, iha Aeroportu Internasionál Prezidente Nicolau Lobato, Comoro, sesta ne’e.

Notísia Relevante: Ohin, Sidadaun Indonézia Na’in-149 Repatria Husi Timor-Leste

Tuir nia, atendimentu di’ak tanba to’o oras ne’e laiha ema ida maka mate no laiha kazu foun.

“Ida ne’e hanesan prestasaun di’ak ida ba Timor-Leste”, nia subliña.

Sorin seluk, nia parte felisita Governu Timor-Leste tanba bele fó oportunidade sidadaun Indonézia na’in-149 fila.

“Hanesan Embaixadór Indonézia iha Timor-Leste, hakarak agradese ba Governu Timor-Leste no komunidade timor-oan ne’ebé ohin loron fó oportunidade ba maluk sira atubele fila ba Indonézia. Sira fila la’ós tanba evakuasaun ho situasaun la seguru iha ne’e, maibé tanba sira-nia hakarak rasik tanba besik ona selebrasaun Muslumanu nian no destinasaun ne’e ba Surabaya, Indonézia”, nia afirma.

Nia adianta, Embaixada Repúblika Indonézia iha Timor-Leste (KBRI, sigla portugés) la prepara fasilidade ba sidadaun sira, tanba hanesan repatriasaun iha situasaun emerjénsia.

Nia salienta, maski Prezidente Repúblika Indonézia, Joko Widodo rekomenda ona ba sidadaun sira labele halo movimentasaun husi estranjeiru ba Indonézia maibé tanba Timor-Leste iha risku kiik ba moras COVID-19 maka sidadaun sira bele fila.

“Ba ha’u Timor-Leste iha risku kiik tanba laiha kazu foun ona, tanba ne’e sira bele fila”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here