Advogadu Manuel Tilman. Imajen/Egas Cristovão

DILI, 15 maiu 2020 (TATOLI)-Advogadu Manuel Tilman ho Miguel Farria, nu’udar reprezentante legál no jurídiku ba membru Bankada Parlamentár CNRT na’in-18,   sesta (15/05/2020), purvolta tuku 15:00 Otl, hatama hikas ‘petisaun’ daruak nian ba Tribunál Rekursu (TRD) hodi kontinua “reklama” atu TR halo fiskalizasaun abstratu konstitusionalidade ba aktu no desizaun Prezidente Repúblika (PR), Francisco Guterres “Lú Olo” liga ho situasaun polítika rai-laran.

Notísia Relevante : Membru Bankada CNRT Sei Hatama Fali Petisaun ba TR Bazeia ba Artigu 150

Ba dala-ida-ne’e, membru Bankada CNRT na’in-18 nia Advogadu Manuel Tilman ho  Miguel Farria, refere petisaun ne’e  ba Konstituisaun RDTL artigu 150 (Fiskalizasaun abstratu dalan Lei-Inan nian), alínea lima (5) kona-ba persentajen baluk-lima ida (1/5) husi númeru Deputadu sira-nian.

Karta petisaun ne’e entrega direita husi Advogadu Manuel Tilman ho Miguel Farria ba Sekretaria Tribunál Rekursu nian. Nune’e, Advogadu Manuel Tilman  klarifika ba jornalista sira katak,  karta petisaun foun ne’e iha alterasaun husi artigu 79 ba fali iha artigu 150 hodi husu TR atu halo fiskalizasaun abstratu konstitusionalidade.

“Ne’e kumpre ona rekizitu prosesuál Tribunál Rekursu nian hodi utiliza artigu 150  kona-ba persentajen baluk-lima ida (1/5) husi númeru Deputadu sira-nian,” esplika Manuel Tilman.

Konteúdu husi petisaun foun ne’e, kontinua mantein petisaun ida anterior hodi husu fiskalizasaun abstratu ba aktu Prezidente Repúblika nian liga desizaun la fó posse ba membru governu ne’ebé kontinua pendente ka  laiha justifikasaun ho desizaun sira seluk durante impase polítika ne’e.

Manuel Tilman klarifika katak, karta petisaun ne’ebé hato’o ba Tribunál Rekursu la’ós akuza Presidente Repúblika, maibé husu Tribunál atu halo apresiasaun liga ho desizaun Prezidente Repúblika nian durante ne’e la’o tuir konstituisaun ka la’e no tuir lei Tribunál Rekursu sei halo analiza hodi fó apresiasaun ba karta petisaun ne’e durante loron -30 nia laran.

Jornalista   : Nelson de Sousa

Editór        : Francisco Simões

 

 

HAKEREK NO HATÁN

Please enter your comment!
Please enter your name here