Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 14 maiu 2020 (TATOLI)-Governu Timor-Leste reprezenta hosi Ministru Negósiu Estranjeiru no Kooperasaun (MNEK), Dionísio Babo Soares ho Reprezentante Organizasaun Nasaun Unidu (ONU) iha TL, Roy Trivedy, kinta ohin asina ona plataforma ba implementasaun programa dezenvolvimentu sustentavel iha área neen durante tinan lima oin mai.

Maski parte rua asina ona nota kooperasaun ne’e ohin,  maibé programa ne’e sei aprezenta ba ONU iha Nova- Iorke hodi hetan aprovasaun iha fulan-setembru 2020.

“Husi área neen ne’e refere liu ba nutrisaun, seguransa alimentár, agrikultura sustentavel. ekonomia traballu dignu, saúde, governasaun di’ak, servisu públiku, dezenvolvimentu klimátika, mudansa klimatika,  kombate ki’ak, akontabilidade no igualidade jéneru,” dehan Ministru Dionísio Babo Soares ba Jornalista Sira iha MNEK, ohin.

“Programa sira ne’e ita sei implementa iha tinan lima oin mai hamutuk ho ONU,” tenik tan.

Eis Ministru Administrasaun Estatál ne’e esplika liután maski asina ona maibé Reprezentante ONU iha TL sei aprezenta ba Nova-Iorke hodi hetan aprovasaun maka foin bele implementa.

”Programa ne’e ita-nia Ministru sira mak sei responsabiliza hodi haree iha área saida de’it mak ita atu implementa iha ita-nia ra’in,”katak Governante.

Entertantu, Roy Trivedy, afirma sente orgullu tanba Timor-Leste mós hola parte iha programa ONU nian liliu ba dezenvolvimentu sustentavel tanba trasa ona planu tinan lima ba aselera prosesu dezenvolvimentu.

“Agora ami presiza atu prepara implementasaun ne’e ho didi’ak kuandu programa ne’e hetan ona aprovasaun husi Nasaun Unidu,” realsa Reprezentante ONU ba Timor-Leste ne’e.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here