Xefi Sentru Saúde Aileu, Rogério da Conceição. Imagén TATOLI/Antónia Gusmão.

DILI, 14 maiu 2020 (TATOLI)-Xefe Sentru Saúde Aileu, Rogerio da Conceição hateten, sira iha ekipamentu sufisiente hodi atende kazu transmisaun surtu COVID-19 iha Munisípiu Aileu.

Ministériu Saúde antes ne’e apoiu ona ekipamentu prevensaun COVID-19 hanesan termoscanner, luvas, roupa protesaun no seluk tan.

Alende ne’e, nia parte hetan mós apoiu fasilidade prevensaun hosi Organizasaun Cruz Vermella Timor-Leste (CVTL-sigla portugés).

“Parte hotu iha ne’e servisu hamutuk kapas los mak parseiru sira hodi ajuda fasilidade fase liman no tenda sira hodi ita halo triazen no seluk tan,” informa Rogerio ba jornalista sira iha Sentru Saúde Aileu, kinta (14/05/2020).

Hodi dehan tan, atu hasa’e koiñesementu komunidade nian kona-ba prevensaun surtu COVID-19, profisionál saúde sira kontinua sensibiliza informasaun ba to’o suku ho aldeia.

Iha sorin seluk, Sança Xavier Barreto nu’udar Doutora ne’ebé toma konta ba programa triazen Sentru Saúde Aileu, relata triazen no vijilánsia la’o di’ak hafoin implementa ona durante loron tolu.

“Durante loron hira ne’e atividade la’o di’ak tebes, maibé iha segunda (11/05/2020) mai to’o ohin loron ami konsege foti ona dadus ba vijilánsia sintinela nian hamutuk ema na’in 22, hosi númeru ne’e mane na’in-sia no feto na’in-13,” nia tenik tan.

Sentru Saúde Aileu haruka ona amostra husi suspeitu COVID-19 na’in-22 ne’e ba Laboratóriu Nasionál hodi halo teste.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here