Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 14 maiu 2020 (TATOLI)–Portavós Sentru Intergradu Jestaun Krize (CIGC sigla portugés), Rui Maria de Araújo informa,  sei iha nafatin sidaudaun nna’in-haat (4) ne’ebé halo klandestinamente hakat liu rai ketan hosi Indonézia mai Timor-Leste nia teritóriu.

Nia hatutan, iha loron 13 maiu 2020 lorokraik no iha loron 14 maiu 2020 dadrersan tuku 05:00 madrugada, Unidade Patroliamentu Fronteira kaer sidadaun Timor-Leste hamutuk na’in-haat (4) no oras ne’e daudaun submete ona fatin kuarentena ne’ebé Governu prepara.

“Sidaudaun na’in-4 mesak mane hotu ne’ebé horiseik Unidade Patroliamentu Fronteira kaer no lori ona ba kuarentena ne’ebé mak Governu prepara ona iha Dili,” dehan Portavós CIGC, Rui Maria de Araújo, liuhosi Konferénsia Imprensa iha Sentru Konvensaun Dili (CCD, sigla portugés), Merkadu Lama, Dili, kinta ne’e.

Nia hatutan, tanba númeru kazu Covid-19 iha provinsia Nusa Tenggara Timur (NTT) Indonézia nian aumenta ba beibeik inklui kazu mate tanba COVID-19, entaun husu ba populasaun sira ne’ebé hela iha rai-ketan atu labele hakat ba-mai ka tama-sai rai ketan.

“Estadu Maior Konjuntu iha Sala Situasaun Sentru Integradu Jestaun Krize husu ba polulasaun sira liuliu sira hirak ne’ebé iha Munisípiu Covalima, Bobonaro ho Rejiaun Administrativu Espesiál Oe-Cusse Ambenu (RAEOA) atu tuur nafatin iha ida-idak nia fatin no labele hakat ba-mai iha rai ketan ho Indonézia, atu labele monu ba risku da’et moras COVID-19 nune’e labele lori mai TL,” nia informa.

Tuir nia, Forsa-Defeza Timor Leste (F-FDTL) no Polisia Nasionál Timor Leste (PNTL) nafatin fó apoiu ba malu no kontinua halo kolaborasaun liuhosi lidér komunitáriu sira, sei nafatin halo vijilánsia másimu iha dalan hotu sira hotu iha rai-ketan entre TL-Indonézia.

Aleinde ida ne’e, portavós ne’e esplika kona-ba liafuan konfinamentu ka kuarentena voluntáriu no obrigatóriu ba populasaun sira tanba ema barak mak seidauk komprende kona-ba termu refere.

“Iha biban ida ohin, hakarak mós hakle’an liutan ita hotu nia entendimentu kona-ba kuarentena ka konfinamentu. Kuarentena ka konfinamentu iha oin rua mak voluntáriu no obrigatóriu. Kuarentena voluntáriu ita aplika ba populasaun tomak, bainhira ita husuatu voluntáriamente ida-idak hela iha uma no lalika sai bainhira la presiza. Ita hotu koko ona kuarentena ka konfinamentu voluntáriu durante periodu estadu emerjénsia nia laran. Kuarentena obrigatóriu, aplika ba ema ne’ebé ita deskonfia lori virus COVID-19 mai,” nia esplika.

Tuir nia, Kuarentena ka konfinamentu obrigatoriu normalmente hala’o durante semana rua nia laran no tenke prenxe kritériu hirak hanesan, ema ida hela iha kuartu idanho haris-fatin ketak no labele besik ka kahur-malu ho ema seluk, atu nune’e hamenus risku ne’ebé atu hada’et moras COVID-19 ba ema seluk.

Entretantu, kuarentena ka konfinamentu obrigatóriu bele halo iha fatin ne’ebé Governu prepara no bele mós halo iha ida-idak ninia uma-rasik, ne’ebe koñesidu ho naran auto-kuarentena maibé tenki prenxe kritériu.

Notísia Relevante: Kazu Ativu iha Izolamentu Vera Crus Hamutuk Na’in-Lima

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here