Atividade Komunidade iha Aldeia Weberec. Imajen/Benycia Sarmento

DILI, 14 maiu 2020 (TATOLI) – Komunidade Aldeia Weberec, Suku Dotic, Postu Administrativu Alas, Munisípiu Manufahi seidauk asesu eletrisidade desde Timor-Leste hetan independénsia to’o agora, tanba ne’e komunidade iha suku ne’e husu Governu liuhosi Ministériu Obra Públika (MOP) atu tau matan.

“Ami husi Komunidade Aldeia Weberec hakarak husu ba autoridade kompetente atu dada ahi Eletrisidade de Timor-Leste (EDTL) ba ami-nia aldeia ne’ebé mak durante Timor-Leste ukun rasik-an besik tinan 20 liu ona ahi EDTL seidauk iha”, tenik  Portavóz Komunidade Aldeia Weberec, Benycia Sarmento, liuhosi komunikadu ne’ebé Agência Tatoli asesu, kinta ne’e.

Tuir nia, durante ne’e povu iha Aldeia Weberec no Wesar, inklui aldeia Sarin ladauk asesu eletrisidade no kondisaun estrada mós ladi’ak, husi Suku Dotic to’o Aldeia Weberec kuaze kilometru lima.

Benycia Sarmento hatutan, liga ba realidade Estadu Emerjénsia ne’ebé akontese hodi prevene moras COVID-19 fatin seluk hetan subsídiu pre-pagu eletrisidade ho valór $15 ba kada kliente, maibé sira rasik iha suku ne’e la bele asesu.

“Oinsá ho ami komunidade ne’ebé mak ahi EDTL seidauk asesu iha kada uma-kain? Ida-ne’e mós Governu halo diskriminasaun ba nia komunidade rasik”, nia lamenta.

Ho nune’e, komunidade Aldeia Weberec husu ba  Governu atu haree didi’ak preokupasaun komunidade Aldeia Weberec, Wesar, no Sarin nian ne’ebé seidauk asesu eletrisidade.

“Ami husu ba Primeiru-Ministro atu fó orientasaun ona ba Ministru obra Publika, atu tékniku MOP sira bele haruka kompañia ida ne’ebé atu ba dada ahi EDTL ba komunidade Aldeia Weberec, Wesar no Sarin tanba komunidade terus tinan barak ona”, nia akresenta.

Biban ne’e, Portavóz ne’e mós rekomenda ba Xefe Suku Dotic atu la bele simu Kompañia, tamba tinan hirak liubá ahi atu tama ona maibé halo kanselamentu ba kompañia refere no husu veteranu sira labele halo impedementu ho kompañia sira seluk tanba povu mak terus.

Nia mós husu ba Ministru Transporte no Komunikasaun atu haforte tan rede ka harii antena foun operadór telekomunikasaun Timor-Telecom, Telkomcel, Telemor ba Aldeia Weberec nune’e komunidade sira seluk bele asesu rede telekomunikasaun ho di’ak.

Nia mós rekomeda ba Prezidente Autoridade Munisípiu Manufahi atu identifika suku ka aldeia ne’ebé mak seidauk asesu eletrisidade, estrada no rede telekomunikasaun, nune’e bele relata relatóriu ba Governu Sentrál hodi tau matan.

”Ami rekomenda mós  ba Prezidente Rádiu Televisaun Timor-Leste, Empreza Públiku (RTTL,EP) atu aumenta tan frekuénsia Rádiu Timor-Leste (RTL) ka Rádio Komunidade Manufahi iha Weberec, Wesar no Sarin”, nia adianta.

Tuir Sensus Uma Kain 2015, komunidade Aldeia Weberec nia populasaun 1.000-resim ho totál uma kain 400-resin.

Jornalista: Florencio Miranda Ximenes

Editora: Julia Chatarina

 

1 KOMENTÁRIU

  1. La’o Weberek deit mak seidauk hetan ahi eletrisidade maibe iha tan Malore ba to’o Caicassa foho ne’ebe mos hanesan knuk ba maluk funu na’in sira, to’o agora Estrada no ahi seidauk tama. Povu nia goja ba ukun rasik mak oinsa sira bele la’o iha Estrada diak no hetan naroman hodi leno sira nia nakukun. Caicassa fatin ida potensia tebes ho aihoris oioin hanesan; kami, ailia, derok masin, au-betun, langkuas, ai-kamelin, ai bubur, kafe, batar, hare rai maran, batar, aifarina. buat sira ne’e dodok let deit iha komunidade sira nia let tamba laiha Estrada hodi transporta sira ba merkadu. fatin hirak ne’e quandu iha eleisaun, Responsavel partidu politik sira hakat to’o no hato’o sira nia komprimissu mesak furak maibe hafoin hetan fiar, fatin hirak ne’e sira la hetan ona ona. Nune’e mosu pergunta bot ba povu sira, bainhira los mak naroman mosu mai, hodi leno sira nia susar no terus. Ho ne’e husu ba parte kompetente ka estadu atu tau matan ba povu nia halerik liliu ba parte sira temi iha leten.

HAKEREK NO HATÁN

Please enter your comment!
Please enter your name here