Administradór Munisípiu Aileu, João Tilman do Rêgo. Imajen: Rafy Belo

DILI, 14 maiu 2020 (TATOLI)-Koordenadór ba Komisaun Prevensaun COVID-19 Munisípiu Aileu, João Tilman do Rego, informa komisaun ninia servisu la’o di’ak tanba hetan kooperasaun no koordenasaun husi parte hotu hodi prevene transmisaun surtu coronavirus iha Aileu.

“Komisaun servisu ba ida ne’e lidera husi ha’u rasik ne’ebé hetan apoiu husi servisu saúde Munisipal ho Sentru Saúde hotu iha Aileu laran husi inisíu to’o agora la’o normal tanba parte hotu servisu hamutuk no iha kolaborasaun ne’ebé di’ak,” dehan nia ba jornalista sira iha Munisípiu Aileu, kinta (14/05/2020).

Atuál Administradór Munisípiu Aileu ne’e hatutan tan katak antes ne’e komisaun halo ona servisu lubuk ida hanesan rega ai-moruk dis-infesaun bá iha Postu Administrativu Laulara hanesan Balibar no Fatisi, nomos hala’o iha postu Aileu no sira seluk tan.

“Asaun konkreta ne’ebé mak ita hala’o iha Munisípiu Aileu mak hetan kolaborasaun di’ak tebes ho parseiru dezenvolvimentu sira World Vision Timor-Leste, Plan Internasional no parseiru lokál sira hanesan Fada, Ria, Cruz Vermella Timor-Leste no seluk tan hodi fó apoiu servisu maka’as iha Aileu,” nia akresenta.

Maski Komisaun enfrenta problema falta ekipamentu, lojiístiku, transporte, maibé tuir nia la sai obstaklu atu komisaun hala’o ninia servisu hodi prevene transmisaun coronavirus iha komunidade nia le’et.

Entertantu, tuir observasaun Jornalista TATOLI nian nota katak komunidade sira iha Aileu kontinua kumpre regra estadu emerjénsia hanesan limita movimentu iha fatin públiku, uza maskra, mantein distánsia sosiál no seluk tan.

Jornalista   : Hortencio Sanchez

Editór         : Agapito dos Santos

HAKEREK NO HATÁN

Please enter your comment!
Please enter your name here