Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 14 maiu 2020 (TATOLI)-Ministru Negósiu Estranjeiru no Kooperasaun, Dionísio Babo Soares, deklara baseia ba dekretu Governu ne’ebé maka Konsellu Ministru aprova ona sei la fó subsídiu ba estudante Timoroan ne’ebé estuda iha rai-li’ur maibé antes ne’e fila ona mai Timor-Leste.

“Dekretu lei ne’ebé mak Konsellu Ministru aprova ona ne’e ko’alia klaru loos katak subsídiu ne’e sei fó de’it ba Timoroan naun Bolseiro iha rai-li’ur de’it. Ba estudante naun bolseiru iha ona Timor sei la hetan,”katak Dionísio Babo Soares ba TATOLI, iha MNEK Praia dos Coqeiros Dili, kinta (14/05/2020).

Tanba ne’e, Governante husu komprensaun husi estudante Timoroan sira ne’ebé fila ona mai rai-laran atu labele reklama sira-nia diretu ba subsídiu Governu ne’e bainhira prosesu pagamentu la’o.

“Tanba ne’e mak ha’u husu ba hotu-hotu atu komprende, estudante naun bolseiru ne’ebé fila ona mai Timor latama iha kategoria tuir lei ne’ebé mak aprova ona iha Konsellu Ministru,” nia apela liután.

Kona-ba prosesu pagamentu, Babo esplika sei hein promulgasaun husi Prezidente Repúblika, Francisco Guterres Lú Olo ba lista estudante naun bolseiru 2014 iha faze dahuluk nian ne’ebé maka Governu aprezenta ona foinlalais.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here