Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Osória Marques.

DILI, 14 maiu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, ohin, informa Governu liuhosi Ministériu Solidaridade Sosiál no Inkluzaun (MSSI) ho Ministériu Administrasaun Estatál (MAE), esforsu aan atu no sei implementa subsídiu $100 ba komunidade sira iha fulan maiu.

“MSSI-MAE esforsu nafatin atu implementa subsídiu $100 ba ita-nia komunidade ka uma-kain sira iha fulan maiu nia laran,” dehan Rui Manuel Gago Exposto, ba Ajénsia TATOLI iha nia knaar fatin MSSI, Caicoli, Dili, kinta ne’e.

Diretór ne’e hateten, data fiksu seidauk bele hatete maibé Governu atu implementa programa ida bainhira hotu ona tenke informa ba nia komunidade atu hatene informasaun antes sira implementa subsídiu ne’e.

“Ita seidauk bele fó sai informasaun kona-ba subsídiu tanba sei iha prosesu nia laran. Bainhira ita atu fó subsídiu ba ema tenke bazeia ba dadus no dadus ne’e tenke mai hosi duni MAE bazeia ba diploma ministerial ka despaisu ministeriál 149 ne’ebé ministériu fó sai iha tinan 2017, 23 agostu, rekezitus ida katak oinsa ema ka sidadaun rejistu uma-kain. Agora MAE haruka hotu tiha lai dadus MSSI, MSSI sei akruza fali dadus ho dadus hosi sistema seguransa sosiál hafoin ita halo prosesu no fahe,” nia dehan.

Nia esplika, objetivu atu haree traballadór ka funsionáriu sira ne’ebé rejistu iha seguransa sosiál ho sira-nia saláriu liu $500 tenke elimina tiha, nune’e ema ne’ebé simu mak ema ne’ebé ho rendimentu família menus hosi $500.

“Ba família ne’ebé mak nia rendimentu liu $500, ne’e sira lahetan. Maibé, dadus ne’ebé mai ne’e tenke uza ona dadus seguransa sosiál tanba iha xefe família balun hanesan funsionáriu públiku ka funsionáriu empreza ne’ebé mak rejistu iha seguransa sosiál ita bele hasai tanba ita deteta ona,” nia subliña.

Tuir nia, aban seidauk bele distribui osan subsídiu $100 tanba dadus seidauk kompleta, tanba falta Munisípiu Rejiaun Administrativa Espesiál Oe-Cusse Ambeno (RAEOA) no Dili.

Diretór Jerál MSSI ne’e afirma, Governu mós halo ona sosializasaun ba autoridade munisipais oinsá atu simu subsídiu.

“Ami prepara ona instrumentu sira ne’ebé presiza halo pagamentu, ami komesa halo sosializasaun ba administradór no Prezidente Munisipál sira nomós ami fahe ona borsura ba komunidade sira liuhosi autoridade lokál kona-ba oinsá atu simu subsídiu no sé-sé mak iha direitu atu hetan subsídiu ne’e. Oinsa sistema no rekezitu atu hetan subsídiu,” nia afirma.

Bainhira atu implementa subsidiu $100 ba komunidade sira, nia dehan, sei servisu hamutuk ho banku BNCTL tanba xefe suku no xefe Aldeia mós tenke iha konta bankária para bazeia ba dadus ne’ebé mai hosi MAE depois uza ho sistema seguransa sosiál nian hodi nune’e fasil fahe.

“Ita haree dadus sira ne’ebé elizivel. Nune’e ita haree fali ba montante osan hira ba kada suku entaun bazeia ba hirak ne’e mak ita halo proposta ba finansa. Ministériu Finansas bazeia ba proposta ne’e mak MF bele halo transferénsia osan ba suku tuir proposta ne’ebé MSSI-MAE nian. Depois BNCTL mak sei lori osan to’o iha Postu Administrativu sira no ekipa pagamentu sei fó ba suku hodi fahe ba komunidade sira,” nia dehan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here