Vise-Ministru Administrasaun Estatál Abílio José Caetano.Imajen/Antonio Goncalves

DILI, 14 maiu 2020 (TATOLI)-Governu liuhosi Ministru Administrasaun Estatál ein ezersísiu, Abílio José Caetano, ameasa sei fó sansaun ba Autoridade Lokál hanesan Xefe Suku no Aldeia bainhira identifika halo kobransa ilegál durante prodúz fisa família ba populasaun hodi sai benefisiáriu ba subsídiu Governu $ 100.

Atu deteta kazu kobransa ilegal ne’ebé komete husi Autoridade lokál sira maka MAE estabelese ona ekipa ida kompostu husi Inspesaun Jéral MAE, Diresaun Nasionál Apoiu Suku (DNAS), no Ajénsia Fiskalizasaun husi Munisípiu hahú halo ona investigasaun iha terrenu.

“Ha’u halo ona karta eskrita ba ita-nia nai xefe suku sira hotu atu labele halo kobransa ba komunidade sira,” katak, Atuál Vise Ministru Administrasaun Estatál ne’e ba TATOLI, iha edifísiu MNEK, Praia dos Coqeiros Dili, kinta (14/05/2020).

Durante assume pasta nu’udar Vise MAE, nia hateten seidauk fó kualker orientasaun ba Xefe Suku no Aldeia atu halo kobransa ho forma oioin ba komunidade iha baze.

Abílio José Caetano, rekoiñese daudaun ne’e simu ona karta husi Provedória Diretu Umanu no Justisa (PDHJ-sigla portugés) kona-ba kazu kobransa ilegal ne’e.

“Ha’u mós simu informasaun katak iha suku balun aproveita oportunidade hodi halo kobransa ba família uma-kain sira ne’ebé mak agora daudaun trata hela dokumentu atu hetan subsídiu $ 100 husi governu. Maibe ha’u rasik mós seidauk simu dadus konkreta suku hira no suku ne’ebé de’it mak halo atividade ida ne’e,”Governante ne’e esklarese.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here