Mídia PR.

DILI, 14 maiu 2020 (TATOLI)–Prezidente Tribunál Rekursu (PTR), Deolindo dos Santos, aprezenta ba Prezidente Repúblika (PR), Francisco Guterres “Lú Olo”, katak durante estadu emerjénsia, Tribunál Rekursu konsege deside prosesu pendente sira hahú husi tinan 2018-2019, inklui kazu sira ne’ebé tama iha tinan 2020.        

                      

“Maski situasaun Estadu Emerjénsia maibé Tribunál Rekursu ami funsiona ho di’ak nafatin. Ho ida ne’e maka ha’u bele dehan katak ami iha rezultadu ne’ebé maka pozitivu tebes no hato’o ba Prezidente Repúblika, katak ita iha prosesu ne’ebé maka pendente hahú hosi tinan 2018, 2019 no kazu sira ne’ebé tama iha tinan 2020. Kazu pendente hirak ne’e,  ita iha 2012 prosesu. Maibé, to’o ohin loron (14 fulan maiu), ita iha de’it ona proseu 14 iha Tribunál Rekursu,” dehan Prezidente Tribunál Rekursu, Deolindo dos Santos, ba jornalista sira hafoin hala’o enkontru mensál ho Xefe Estadu iha Palásiu Prezidensiál Bairru Pité, Dili, kuarta ne’e.

Nia dehan, oras ne’e daudaun hosi kazu 14 ne’ebé sei iha, kompostu hosi kazu sivil iha tolu no kazu krimi iha 11 prosesu.

Deolindo rekoñese katak, ida ne’e hanesan esforsu ne’ebé mak boot tebes no Tribunál rasik halo, atu nune’e servisu ne’e bele la’o di’ak liután iha Tribunál Rekursu.

“Ha’u mai hato’o ba Prezidente Repúblika katak maski ho situasaun estadu emerjénsia maibé Tribunál funsiona nafatin ho forma ne’ebé normál, diferente ho prosesu sira ne’ebé la’o iha Tribunal Primeira Instansia. Tanba funsiona ho forma limitadu ba kazu urjente de’it tanba implementasaun Estadu Emerjénsia,” nia hateten.

Nia esplika, Tribunál tenke funsiona nafatin tanba lebele taka dalan ba sidadaun hotu atu buka justisa iha tribunal no realidade hatudu katak, prosesu sira ba julgamentu durante fulan ida ne’e la’o.

Kona-ba ne’e, nia hateten, Prezidente Repúblika apresia no husu Prezidente Tribunal Rekursu hala’o nia servisu ho efetivu liután hafoin estadu emerjénsia.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here