Abertura enkontru jerál Brigada Soque Luta Kontra COVID-19 RAEOA iha Salaun Enkontru Alfándega, Palaban, tersa (12/05). Imajen/Mídia RAEOA-ZEESM

DILI, 14 maiu 2020 (TATOLI) – Autoridade Rejiaun Administrativa Oé-cusse Ambeno (RAEOA) liuhosi ekipa Brigada Soque Luta Kontra COVID-19 iha loron 12 no 13 maiu, hala’o enkontru hodi diskute kona-ba projesaun ba futuru.

“Diskusaun loron-rua ne’e hamosu projesaun kona-ba planu ba futuru, liu-liu hadi’ak temporáriu kondisaun infraestrutura no ekipamentu ne’ebé presiza bainhira akontese moras da’et sira seluk iha rejiaun Enklave Oé-Cusse”, refere nota komunikadu husi Autoridade RAEOA, ne’ebé maka Agência Tatoli, kinta ne’e.

Ekipa Brigada Soque Luta Kontra COVID-19 lidera husi eis Ministru Saúde, Nelson Martins no hetan apoiu másimu husi Prezidente Autoridade RAEOA, José Luís Guterres ‘Lugu’.

Ezisténsia Brigada Soque Luta Kontra COVID-19 bazeia ba deklarasaun husi Organizasaun Mundiál Saúde (OMS) iha loron 11 marsu 2020, ne’ebé konsidera COVID-19 nu’udar pandemia globál.

“Prezensa husi estrutura ne’e hodi aliña mós ho serbisu estrutura Sentru Integradu Jestaun Krize (CIGC, sigla portugés), ne’ebé lidera husi Primeiru-Ministru, Taur Matan Ruak. Nune’e mós reforsa ho despaisu Prezidente RAEOA kona-ba estabelesimentu estrutura Forsa Tarefa Prevensaun no Mitigasaun surtu COVID-19 iha RAEOA”, hateten Nelson Martins iha sesaun aprezentasaun kona-ba papél husi kada pilár sira

Enkontru ne’ebé realiza iha Salaun Enkontru Alfándega, Palaban, konsege harii ekipa ho pilár neen ho área ezekusaun servisu hanesan pilár dahuluk maka koordenasaun, planeamentu, monitorizasaun no avaliasaun, pilár daruak komunikasaun no intervensaun saúde públika no pilár datoluk vijilánsia epidemiolojia.

Nune’e mós, pilár dahaat maka konsentra iha jestaun klíniku no diagnóstiku, pilár dalimak konsentra iha implantasaun resposta rápida no ikus liu pilár daneen kona-ba administrasaun, finansas, lojístika no rekursu umanu.

Kada pilár lidera husi Atoni-oan sira ne’ebé iha ona kapasidade jestaun ho esperiénsia serbisu  

hodi fó susesu ba esforsu Autoridade RAEOA ba luta kontra COVID-19 liuhosi ekipa Brigada Soque.

Iha loron ikus enkontru ne’e, ekipa Brigada Soque konkorda ona pedidu orsamentu hodi hatán ba situasaun atuál, inklui projesaun no planu ba futuru hodi mellora prestasaun serbisu saúde iha RAEOA hanesan harii fasilidade infraestrutura adekuadu inklui ekipamentu saúde hodi hatán ba moras da’et sira seluk, nune’e prevee verba orsamentu hamutuk $4.476.936,20.

Enkontru ne’e hetan partispasaun másimu husi ekipa Brigada Soque, reprezentante instituisaun hotu, reprezentante igreja no sosiedade sivíl.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here