Vise Xefe Bankada Parlamentár PLP, Francisco de Vasconcelos. Imajen/ Egas Cristovao.

DILI, 14 maiu 2020 (TATOLI)—Vise-Xefe Bankada Partidu Libertasaun Populár (PLP), Francisco de Vasconcelos informa, Bankada Parlamentár tolu (3) kompostu hosi FRETILIN, PLP no KHUNTO hato’o ona pedidu rekerimentu ba Vise-Prezidente Parlamentu Nasionál (VPN) na’in-rua lidera meza hodi halo diskusaun iha plenária.

“Ami hato’o ona pedidu rekerimentu ida tán ba vise-prezidente na’in-rua lidera plenária. Ita hein loron plenária, iha semana oin. Kuandu vise sira iha impedimentu deputadu ne’ebé idade boot liu hanesan L7 bele lidera meza,” Vise-Xefe Bankada Partidu Libertasaun Populár (PLP), Francisco de Vasconcelos, informa ba jornalista sira, iha resintu Parlamentu Nasionál, kinta ne’e.

Nia esplika, pedidu ne’e bankada tolu halo tanba rekerimentu dahuluk ba Prezidente Parlamentu Nasionál, Arão Noé de Jesus da Costa Amaral la konsidera.

Nune’e mós rekerimentu daruak hosi bankada tolu insiste hasoru Prezidente Parlamentu Nasionál maibé to’o oras ne’e la konsidera nafatin.

“Rekerimentu ida ba vise-prezidente sira-ne’e tanba rekerimentu rua tuituir-malu husu nia obrigatoriamente ba pedidu destituisaun, nia la halo iha dentro loron 5 nia laran. Liu tiha loron 5 ami haruka pedidu rekerimentu ida ba tán hodi insiste nia tenke marka ajenda plenária. Agora liutiha ona prazu rejimentál entaun ami halo pedidu rekerimentu ida husu Vise-Prezidente na’in-rua lidera plenária aplika rejimentu artigu 22 alíena 1,” nia dehan.

Maibé Vise-Xefe Bankada PLP ne’e insiste, agora la tempu ona aplika rejimentu 17 maibé aplika ona rejimentu artigu 22 alínea 1.

Vise-Xefe Bankada PLP ne’e argumenta ho Rejimentu Parlamentu Nasionál (RPN) artigu 22 kona-ba vise-prezidente sira-nia kompeténsia alínea 1, hateten vise-prezidente sira, rotativamente, substitui prezidente wainhira nia falta ka iha impedimentu ruma; bainhira vise-prezidente sira mak falta ka iha impedimentu, Deputadu tinan boot liu hotu mak kaer prezidénsia.

Hatán ba kestaun ne’e, Prezidente Parlamentu Nasionál, Arão Noé de Jesus da Costa Amaral, argumenta, loloos ne’e karta rekerimentu ne’e dirije ba Prezidente Parlamentu Nasional la’ós rekerente sira dirije fali ba Vise -Prezidente Parlamentu Nasional.

Prezidente Parlamentu Nasionál, Arão Noé de Jesus da Costa Amarál, uza RPN artigu 17 kona-ba kompeténsia prezidente parlamentu nasionál nian, hahú hosi alíea 1-a to’o k.

“Ida ne’e Kontra Rejimentu Parlamentu Nasional artigu 17, nune’e konsidera ilegál no la tuir regra administartivu Parlamentu Nasionál nian. Tanba durante ne’e Prezidente Parlamentu Nasional kontinua hala’o nia funsaun no nunka falta ka iha impedimentu, nune’e rekerente nia akuzasaun katak PPN falta no iha impedimentu ne’e laloos, ilegál no la justifikavel,” nia dehan.

Notísia Relevante: Laiha Dalan Ba Destituisaun, Arão Noé Kontinua Hein PR Lú Olo Disolve PN

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here