Airnorth atera iha Aeroportu Internasionál Prezidente Nicolau Lobato, sesta (03/04). Imajen Tatoli/António Gonçalves

DILI, 14 maiu 2020 (TATOLI) – Airnorth ne’ebé halo ona kooperasaun ho Governu Timor-Leste hodi halo operasaun semana ida dala tolu hodi transporta ekipamentu médiku no transporta ema iha situasaun emerjénsia konsege kansela voo dala-rua.

Ministru Transporte no Komunikasaun, José Agostinho da Silva, hateten aviaun australianu ne’e hahú fali ona operasaun hafoin iha semana rua la halo operasaun mai Dili tanba atraza iha pagamentu maibé parte tékniku husi Ministériu Transporte no Komunikasaun (MTK) no Gabinete Prezidénsia Konsellu Ministru rezolve ona no agora opersaun la’o ho normál fali tuir kontratu ne’ebé maka iha.

“Tempu hirak liubá Airnorth  kansela voo dala-rua iha semana rua liubá kotuk tanba iha tempu ne’ebá sira tau kestaun pagamentu husi Governu Timor-Leste”, dehan Ministru iha ninia knaar fatin, Caicoli, kinta ne’e.

Tuir governante ne’e, hafoin konfirma maka hatene katak pagamentu uza fundu foun no ninia sistema mós foun, tanba ne’e hafoin dadus haruka inklui konta bankária husi Airnorth iha fallansu oituan tanba ne’e konfirma filafali atu halo transferénsia.

“Tuir sira katak númeru konta bankária Airnorth nia ne’ebé maka sira haruka mai iha nota  entendimentu la funsiona ona entaun falla ne’e husi ne’ebá”, nia akresenta.

Nia salienta, ho fallansu ida-ne’e maka presiza altera filafali kontratu hodi muda konta bankária tanba parte Airnorth manda ona konta bankária ne’ebé válidu.

“Portantu parte ita-nia, ha’u subliña laiha fallansu ruma. Entaun tempu ne’ebá kedan konfirmadu no pagamentu la’o ho normál entre parte rua bazeia ba entendimentu”, nia akresenta.

Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Maski nune’e, haree ba nesesidade iha situasaun emerjénsia nia laran, Governu Timor-Leste liuhosi MTK deside selebra akordu ho Airnorth, ne’ebé sei permite operasaun aéreu sira entre Dili no Darwin atu tula ekipamentu médiku relasiona ho COVID-19

Tuir akordu ne’ebé estabelese ona iha loron tersa (07/04) entre Governu Timor-Leste no Airnorth, ligasaun aéreu atu garante konektividade iha situasaun emerjénsia nia laran no sei halo operasaun semana ida dala-tolu.

Akordu hirak ne’e mosu, hanesan resposta ba restrisaun viajen nian ho eskala boot ne’ebé Governu estabelese ona hodi hapara propagasaun COVID-19, no evita atu Timor-Leste labele sai izoladu, sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nian.

Iha loron 10 abríl,  Airnorth lansa voo dahuluk tula ai-moruk no ekipamentu médiku nesesáriu hodi kombate COVID-19.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here