Diskusaun artigu balun iha esbosu Lei Rádiodifuzaun iha Salaun Sosiedade Sivíl, Palásiu Governu, kuarta (13/05). Imajen/DNDI

DILI, 13 maiu 2020 (TATOLI) – Sekretaria Estadu Komunikasaun Sosiál (SEKOMS) liuhosi Diresaun Nasionál Diseminasaun Informasaun (DNDI), konvoka enkontru ho Konsellu Imprensa, reprezentante mídia nasionál inklui Timor-Leste Press Union (TLPU) no Asosiasaun Jornalista Timor-Leste (AJTL) hodi halibur opiniaun kona-ba artigu balun iha esbosu Lei Rádiodifuzaun.

“Ami ohin la’ós atu halo diskusaun ba esbosu Lei  Rádiodifuzaun tomak, maibé ami nian presenza iha ne’e atu halo diskusaun artigu balun husi Lei ne’e”, informa Prezidente Konsellu Imprensa (KI), Virgílio da Silva Guterre ba Agência Tatoli hafoin ramata diskusaun iha Salaun Sosiadade Sivíl, iha Palásiu Governu, kuarta ne’e.

Nia haktuir, artigu ne’ebé diskute kona-ba koima no sansaun.

“Entaun Konsellu Imprensa mai iha ne’e fó opiniaun katak aplikasaun koima sira ne’e tenke reflete ba kapasidade órgaun komunikasaun sosiál ida-idak no importante liu maka aplikasaun koima sira labele limita fali oportunidade inisiativa sidadaun nian atu hamoris meiu komunikasaun sosiál ne’ebé sai hanesan kanál ba liberdade espresaun no liberdade imprensa iha Timor-Leste”, dehan Virgílio.

Ba kestaun ne’e, parte KI disponível nia tempu  atu fó hanoin ba ekipa SEKOMS ne’ebé responsabliza ba elaborasaun esbosu Lei Rádiodifuzaun.

“Ami preparadu, bainhira maka SEKOMS hakarak envolve ami iha diskusaun ne’e ami nafatin fó hanoin”, nia salienta.

Parte seluk, KI fó hanoin balun kona-ba ezisténsia Komisaun Nasionál ida ba Rádiodifuzaun

“Ami fó ona pareser ba ekipa ne’ebé elabora Lei Rádiodifuzaun atu konsidera. Hanesan ezisténsia Komisaun Nasionál ida atu haree ba kontiúdu programa ka kontiúdu jornalístiku ninian. Hein katak ekipa ne’ebé prepara esbosu ne’e bele konsidera hanoin sira ne’e no kualker maneira Konsellu Imprensa prontu nafatin atu fó ninian hanoin relasiona ho lei sira ne’ebé implika ba liberdade imprensa no liberdade espresaun nian”, nia subliña.

Iha fatin hanesan, Reprezentante Televisaun Edukasaun Otelio Otte, haktuir enkontru ohin diskute kona-ba artigu 8 to’o 20.

Nia husu atubele fó esbosu lei ne’e tomak atu nune’e bele hatene dispozisaun jerál, kontiúdu, to’o ninia sansaun ba lisensa frekuénsia inklui Komisaun Nasionál Rádiodifuzaun, tanba iha ona esperiénsia bainhira kontribui hanoin ba elaborasaun lei.

“Iha Lei Komunikasaun Sosiál nian, ami halo ba artigu tomak. Tanba ne’e, se bele karik molok Lei   Rádiodifuzaun ne’e lori ba Konsellu Ministru, ninia artigu sira fó mai ami hodi bele intende artigu pur artigu tanba iha 50 artigu iha esbosu lei ne’e”, nia relasa.

Tuir nia, aplikasaun koima presiza define mínimu no a’as liu ne’e hira no se bele karik labele halo kategoria koima entre rádiu komunidade sira no ba rádiu privadu sira, maibé koima ne’ebé fó tenke jerál de’it atu entidade hotu bele kumpre.

“Tenke tau koima ein jerál ba rádiu komunidade no rádiu privadu sira atu ema hotu iha responsabilidade katak tenke asegura duni mídia ho kuidadu, nune’e atubele iha sentidu responsablidade ba mídia rasik”, subliña jornalista senior ne’e.

Nune’e mós, Diretór Diresaun Nasionál  Diseminasaunn Informasaun, Estevão da Costa Belo, hateten SEKOMS organiza diskusaun ho objektivu atu ekipa ne’ebé prodús lei ne’e bele tau hanoin hamutuk.

Tuir Dirijente ne’e, maski Autoridade Nasional Komunikasaun (ANC, sigla portugés) seidauk hola parte iha diskusaun ne’e maibé iha parte finál lei ne’e rasik antes atu lori ba Konsellu Ministru SEKOMS sei halo diskusaun, nune’e tau hanoin hamutuk ba lei ne’e rasik.

“Uluk ami konvida hotu parte Autoridade Nasionál Komunikasaun, maibé dala ruma sira okupadu no labele partisipa. Ami sei konvida filafali tanba ohin ne’e la’ós atu halo diskusaun finál maibé aban bain-rua bainhira esbosu lei ne’e iha ona faze finalizasaun sei bolu filafali atu husu sira-nia hanoin ba esbosu lei ne’ebé SEKOMS rasik halo ona”, nia adianta.

Diskusaun ba artigu balun esbosu Lei Rádiu Difuzaun ne’e rasik hetan partisipasaun másimu husi reprezentante mídia nasionál hansan RTTL,EP, GMN TV, TV Eto+, STL TV inklui Diretór Rádiu Komunidade sira no mós Responsável Asosiasaun Jornalista sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here