Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 13 maiu 2020 (TATOLI) – Partidu Congresso Nacional Timor-Leste (CNRT) iha loron 11 maiu 2020 deklara retira ona husi VIII Governu Konstitusionál no deside kuadru partidu ne’ebé envolve hanesan membru governu atu rezigna-an.

Ministru Negósiu Estranjeiru no Kooperasaun, Dionísio da Costa Babo Soares, hateten maski partidu CNRT husu tiha ona atu ninia membru governu  livre vontade atu rejigna-an husi Estutura VIII Governu Konstitusionál, maibe Primeiru-Ministru (PM), Taur Matan Ruak fó livre ba membru governu husi CNRT atu deside.

“Ami hanesan membru partidu CNRT hanoin hela, maibé Primeiru-Ministru hateten katak nia la pretende atu hasai membru governu sira maski maihusi partidu CNRT, Primeiru-Ministru dehan fó livre ba ami sira mak deside”, tenik Ministru Deonísio hafoin reuniaun Konsellu Ministru iha Salaun Ministériu Finansa, Aitarak-Laran, kuarta ne’e.

Notísia Relevante: CNRT Deklara Retira Hosi VIII Governu

Kuadru CNRT ne’ebé envolve iha VIII Governu Konstitusionál mak hanesan Ministru Estadu Prezidénsia Konsellu Ministru, Hermenegildo Augusto Cabral Pereira, Ministru Negósiu Estranjeiru no Kooperasaun, Dionísio da Costa Babo Soares, Ministra Edukasaun, Juventude no Desportu, Dulce de Jesus Soares, Vise-Ministra Finansa, Sara Lobo Brites, Vise-Ministru Administrasaun Estatál, Abílio José Caetano, Sekretáriu Estadu Kooperativa, Arsénio Pereira da Silva, Sekretáriu Estadu Juventude no Desportu, Nélio Isaac Sarmento, Sekretáriu Estadu Arte no Kultura, Teófilo Caldas, Sekretáriu Estadu Asuntu Kombatente Libertasaun Nasionál, Gil da Costa Monteiro ‘Oan Soru’.

Relasiona ho desizaun partidu, atuál membru Komisaun Polítika Nasionál partidu CNRT ne’e dehan membru govenru husi CNRT sei komunika malu hodi hetan entedimentu ida hafoin foti desizaun.

“Agora ne’e ami sei koa’lia atu haree karik iha desizaun ruma, ami tenke komunika halo didi’ak atu halo entedimentu ida maka ami bele foti desizaun, maibe ami servisu la’o hanesan normál tanba Primeiru-Ministru fó hela fiar mai ami ba servisu”, nia salienta.

Tuir governante ne’e, kona-ba kestaun Estadu, partidu ida bele troka no Governu mós troka tanba ne’e normál iha prosesu demokrátiku

“Naran katak kumpre rekezitu hotu, klaru katak koligasaun foun iha ninia ezijensia no formatu foun tanba ne’e sei determina posizaun tuir mai”, nia akresenta.

Ministru Babo adianta, hanesan membru governu ne’ebé hetan fiar husi Xefe Governu, nia parte kontinua hala’o servisu hodi serbí Estadu.

“Maibé hanesan membru partidu CNRT ami mós hetan informasaun, maski seidauk simu notifikasaun individuál ba ami ida-idak husi partidu. Hanesan membru governu no hanesan individuál ami sei hala’o servisu tuir mandatu ka fiar ne’ebé Primeiru-Ministru fó”, nia subliña.

Tuir Dionísio, komunikadu imprensa ne’ebé partidu CNRT hasai ona katak membru sira livre vontade atu deside katak atu mantein maka sira sei dez-vinkula durante sira nia mandatu labele ko’alia lori partidu CNRT nia naran.

“Hanesan ne’e de’it, la dehan tenke sai ka la sai husi estrutura VIII Governu Konstitusionál”, nia realsa.

Jornalista: Florencio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here