Xefe Estadu Maiór Forsa Defeza Timor-Leste (F-FDTL), Majór Jenerál Lere Anan Timur. Imajen Tatoli/Egas Cristovão

DILI, 13 maiu 2020 (TATOLI)–Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, fó atensaun sériu ba kualkér sidadaun atu labele tama-sai fronteira terrestre ho dalan illegál.

“Se mak iha sorin, tantu ita timoroan mak ba iha ne’eba ka Ttmoroan mak sai ona sidadaun Indonézia, bainhira hakarak atu tama mai territóriu Timor Leste, tenke tuir dalan legal no labele liuhosi dalan ilegál. Ida ne’e mak importante liu,”  Lere fó atensaun ne’e, hafoin enkontru regulár ho Prezidente Repúblika (PR), Francisco Guterres ”Lú Olo”, iha Palásiu Prezidensiál, Bairru Pité, Dili, kuarta ne’e.

Lere esplika, durante enkontru regulár ho Prezidente Repúblika, informa kona-ba situasuan rai laran, d’iak hela, kalma, no laiha buat ida. Maibé, atividade forsa armada ninian, komandu komesa reforsa fronteira ninian, la’ós tanba ba funu ho arma maibé funu hasoru Coronavirus (COVId-19).

“Ida ne’e mak ami reforsa tan postu rua ka tolu iha fronteira ne’eba atu bele prevee ema ne’ebé tama illegal, tanba bele lori moras mai rai laran no bele kontajia  ba ita-nia populasaun,” nia hateten.

Kona-ba medida seguransa iha fronteira, lider másimu forsa armada ne’e hateten, kuandu hetan kaer nia lori mai entrega iha polisia.

“Se halai, tiru tohar tiha nia ain tanba fronteira ne’e fronteira duni, ne’ebé nasaun rua mak fahe malu. Ita tama, tenke tuir dalan odamatan nian, la’ós tama tuir fali janela. Tanba ne’e, bainhira forsa hetan no bolu, tenke koopera, se lae hili buat rua, entre mate ou ain tohar,” nia apela.

Lere mós rekoñese katak, situasaun iha forsa armada enfrenta problema barak, tanba impase politika ida ne’e, liu-liu kona-ba lojístika, manutensaun ba karreta operasionál sira, no buat seluk tan, maibé hanesan líder ida Lere mós labele fó sala ba situasaun.

“Agora lider ida-idak, komandante, dirijente ida-idak mak tenke halo oinsa mak ninia instituisaun ne’e bele normaliza ninia atividade sira, loro-loron nian,” Veteranu ne’e, rekoñese.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here