Xefe Estadu Maiór Jenerál F-FDTL, Majór Jenerál Lere Anan Timur Imajen/Eugénio Pereira

DILI, 13 maiu 2020 (TATOLI)–Xefe Estadu Maior Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, apela ba veteranu sira iha territóriu tomak atu unidade nafatin tanba situasaun politika rai laran ne’e agora konfuzaun boot.

“Ha’u apela ba maluk veteransu sira, sira ne’ebé mak hanesan rezisténsia ninia ema tomak, atu vizilánsia. Atu matan moos, tilun mós moos, tanba ema ne’ebé mak la gosta ita, ne’e la gosta ita nafatin. Hakarak sobu ita nia unidade. Ne’e dezde uluk funu laran, too agora. Sira ninia planu mak halo oinsá sobu, liu-liu lideransa ne’e. Ezemplu sira kria impase polítika ne’ebé maka agora la’o daudaun ne’e,” dehan Lere Anan Timur fó sai apelu ne’e hafoin enkontru regulrár ho Prezidente Repúblika (PR), Francisco Guterres ”Lú Olo”, ba jornalista sira iha Palásiu Prezidensiál Birru Pité, Dili, kuarta ne’e.

Tanba ne’e, Lere hateten, presiza diálogu entre veteranu sira liuliu lider sira. Lere haree ba katak uluk iha grupu ida sakrifika ninia-aan atu ikus mai rai Timor-Leste ne’e bele sai ukun aan ho moto ida katak sobrepoin ba povu Timor nian no sakrifika ami ida-idak ninia interese.

“Ohin loron mós podia akontese hanesan ne’e. Maibé, partidu polítiku no polítiku sira sobrepoin sira nia interese no partidu ninia interese aas liu fali interese nasaun ninian,” Lere hateten.

Lere hateten, ohin loron la rona ema seluk nia naran maibé rona mak Xanana Gusmão, Taur Matan Ruak, no Francisco Guterres Lu Olo, ne’ebé sira ne’e mesak  maun alin de’it. Tanbasá mak timoroasn sira seluk  hakarak atu hatama kanuru tohar iha ne’ebá.

“Sira na’in tolu nia problema, ami na’in tolu sei tuur hamutuk. Ami mak sei rezolve. Polítiku sira lalika ko’alia bara-barak, lalika soran tun sa’e no lalika lansa boatus oin-oin. Tanba nasaun ne’e harii ho raan no ruin. Tanba ne’e mak ha’u apela ba veteranu sira atu matan moos nafatin, atu koñese sé mak ó-nia amigu no sé mak ó-nia inimigu. Tanba ohin loron ne’e konfuzaun boot. Ha’u la fiar ami sira  ne’ebé mai hosi ai-laran ne’e atu fahe malu no ami atu kontra malu, ida-ne’e ha’u la fiar,” Lere subliña.

Ho situasaun ne’e, Lere fó fiar nafatin ba lider nasionál sira katak sira sei hakotu impase politika ne’ebé oras ne’e nasaun ne’e enfrenta tanba sira-nia relasaun sempre di’ak.

“Agora daudaun ha’u fó fiar nafatin ba ha’u-nia maun sira ne’ebé uluk komanda luta to’o funu remata. Ami-nia relasaun sempre di’ak nafatin,” Veteranu ne’e fiar.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here