Primeiru-Ministru, Taur Matan Ruak, prezide reuniaun Konsellu Ministru iha Salaun Ministériu Finansa, Aitarak-Laran, kuarta (13/05). Imajen Tatoli/Egas Cristovão

DILI, 13 maiu 2020 (TATOLI) – Ezekutivu sira liuhosi reuniaun Konsellu Ministru (KM) aprova kuadru kooperasaun ba dezenvolvimentu sustentável entre Governu Timor-Leste no Organizasaun Nasaun Unidu (ONU) ba períodu kompreendidu entre tinan-2021 to’o 2025.

“Konsellu Ministru aprova framework Nasaun Unida Nian ba kooperasaun dezenvolvimentu sustentável. Ida-ne’e sai hanesan baze ba ONU iha Timor-Leste hafoin kada ajénsia sei halo sira nia planu no medida ba kooperasaun ho Timor-Leste iha futuru”, relata Ministru Reforma Lejizlativa no Asuntu Parlamentár, Fidelis Manuel Leite Magalhãs liuhosi konferénsia imprensa hafoin reuniaun KM iha Salaun Ministériu Finansa (MF), Aitarak-laran, kuarta ne’e.

Governante ne’e subliña, kooperasaun entre Timor-Leste no ONU ba futuru sei foku ba dezenvolvimentu Timor-Leste nian rasik, ne’ebé maka ONU sei presta apoiu.

Área ne’ebé foku husi kooperasaun ONU nian iha períodu 2021-2025 mak hanesan nutrisaun, seguransa Ai-han, agrikultura sustentável, oportunidade ekonomia sustentável no traballu desente ba ema hotu, dezenvolvimentu infantíl no rezultadu no aptidaun aprendizajen ba vida tomak, kuidadau saúde no bein-estar ba kualidade.

Nune’e mós, governasaun responsável, inklusiva no partisipativa no servisu públiku kualidade, ikus liu jestaun sustentável rekursu naturál no reziliénsia ba mudansa klimátika.

Biban ida ne’e, KM atribui podér tomak Ministru Negósiu Estranjeiru no Kooperasaun atu hala’o asinatura ba akordu refere.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here