Xefe Sentru Saúde Gleno, José de Carvalho Imajen Tatoli/António Gonçalves

GLENO, 13 maiu 2020 (TATOLI)-Sentru Saúde Gleno Munisípiu Ermera liuhosi programa triazen no vijilánsia sentinela foti ona amostra hosi pasiente hamutuk ema na’in 30 hodi submete ba teste laboratóriu tanba mosu sintoma COVID-19.

Xefe Sentru Saúde Gleno, José de Carvalho ba jornalista sira iha Gleno hateten, amostra ne’e haruka ona Laboratóriu Nasionál Dili hodi halo teste, tanba ne’e maka sira sei kontinua hein rezultadu teste laboratóriu.

Nia esplika komesa ona implementa programa vijilánsia sentinela ne’e iha loron 05 fulan maiu no sei ramata iha loron 15 fulan hanesan tinan 2020.

“Atividade ne’e atu bele foti sampel ba komunidade sira ne’ebé hatudu sintoma, hodi bele deteta karik komunidade sira hetan moras COVID-19 ne’e,”katak Xefe Sentru Saúde Gleno ne’e, kuarta (13/05/2020).

Tuir nia katak oras ne’e Sentru Saúde atende pasiente sira ho moras baibain no atende espesífiku ba sira ne’ebé iha sintoma coronavirus.

“Sentru Saúde Gleno mós hetan apoiu hosi parseiru balun hanesan Maluk Timor hodi kria tenda ba triajén ne’e rasik, antes ba atividade ne’e ekipa médiku sira hetan treinamentu hosi profisionál saúde nasionál,”tenik tan.

Atu evita mosu transmisaun lokal, profisionál saúde sira kontinua halo kontaktu direta no indireta ba abitante kuarentena obrigatóriu husi Munisípiu Ermera ne’ebé antes ne’e kumpre kuarentena 14 hodi konfirma filafali sira-nia kondisaun saúde ba prevene transmisaun surtu COVID-19.

Jornalista : Hortencio Sanchez

Editór      : Agapito dos Santos

HAKEREK NO HATÁN

Please enter your comment!
Please enter your name here