Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 13 maiu 2020 (TATOLI)-Ministru Negósiu Estranjeiru no Kooperasaun (MNEK), Dionísio Babo Soares, informa governu sei kontinua verifika lista estudante naun bolseiru ne’ebe daudaun ne’e estuda iha estranjeiru antes halo pagamentu ba subsídiu Governu .

Iha Semana kotuk, MNEK informa ona prosesu pagamentu iha posibilidade akontese iha semana ida ne’e maibé sei hein rezultadu husi prosesu verifikasaun ikus.

Maski nune’e, MNEK daudaun ne’e simu ona lista estudante la’ós bolseiru pruvolta ema rihun 2. Maibé balun  husi sira ne’e, fila ona mai Timor-Leste.

“Ami simu hotu ona  naran estudante sira nian inklui sira nia konta bankaria maibé ami mós presiza haree filafali prosedementu tanba estudante balun fila tiha ona mai Timor maibé sira nia naran kontinua tama iha lista atu hetan subsídiu, tanba ne’e tenki kuidadu,” katak, Eis Ministru Administrasaun Estatál, Dionísio Babo Soares ba jornalista sira iha Ministériu Finansa Ai-Tarak-Laran, Dili, kuarta (13/05/2020).

Notísia Relevante :Estudante Rihun Rua Mak Sei Hetan Subsidiu

Tuir lista prosesu pagamentu faze dahuluk nian ba estudante pruvolta 2.000. No prosesu rejistrasaun faze daruak nian mós kontinua la’o.

Kona-ba valór subsídiu ba kada estudante sira ne’e aprova ona baseia ba kustu moris nasaun idak-idak.

Notísia Relevante :Posibilidade Semana Oin Governu Halo Pagamentu ba Estudante Naun Bolseiru

“Lista kona ba kustu vida kada nasaun ida-idak nian sai ona, maibe ha’u seidauk konfirma ho Ministeriu kompotente (Ministériu Ensinu Superiór Siénsia no Kultura) kuandu iha ona mak ha’u hato’o ba ita bo’ot sira,”tenik, Babo.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here