Ministru Koordenadór Asuntu Ekonómiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/António Gonçalves

DILI, 13 maiu 2020 (TATOLI) – Governu husu públiku atu pasiénsia hein implementasaun pakote sosio-ekonómiku ne’ebé tama ona iha planu Governu nian hodi apoia populasaun iha ámbitu Estadu Emerjénsia ligadu ho surtu COVID-19 iha Timor-Leste.

Ministru Koordenadór Asuntu Ekonómiku interinu, Fidelis Manuel Leite Magalhães, hateten medida sira ne’ebé Governu aprova ona hodi fó apoia ba populasaun, daudaun ne’e ministériu implementadór sira servisu maka’as hela liuliu relasiona ho dadus.

“Ha’u rona katak públiku balun hanoin dehan Governu tenke implementa de’it ona, maibé labele implementa sein kuadru legál sira. Atu mós apela ho haraik-an husu atu pasiénsia oituan tanba ministériu implementadór sira servisu maka’as tebes tanba ita-nia rai ne’e durante tinan hiraknia-laran hafoin governasaun ida ba governasaun seidauk konsege hadi’a sistema sira ho-di’ak”, dehan Ministru iha Ministériu Finansa, Aitarak-laran, kuarta ne’e.

Tuir governante ne’e, maski Governu konsidera hanesan dezafíu iha oin, maibé tenke banati nafatin ho dalan ida katak apoiu sei to’o duni no sei to’o ho di’ak tanba Dekretu-Lei no alterasaun sira pasa hotu ona, maibé buat ne’ebé labele halo mak implemeneta sein lei.

“Bainhira halo ona alterasaun kona-ba eskema garantia kréditu, halo mós alterasaun kona-ba kréditu liuliu kona-ba subsídiu ba iha kréditu sira, entaun hatudu duni katak medida sira ne’e to’o faze a’as loos ona, maibé agora iha faze preparasaun ba implementasaun”, salienta atuál Ministru Reforma Lejizlativa no Asuntu Parlamentár ne’e.

Daudaun ne’e, Governu seidauk iha lista kompletu dezagregadu tantu ba família tanba lista kompletu ba dezagregadu bazeia ba ema nia rendimentu no vensimentu.

“Situasaun ida-ne’e iha difikuldade boot governu hasoru satán ho preokupasaun boot kona-ba distansiamentu sosiál maka governu halo esforsu lubun boot ida liuliu MSSI no MAE halo esforsu para bele fó duni apoia ba sidadaun sira atu bele ultrapasa situasaun defisil ida ne’e. Governu atu naran halo de’it saida mak sei akontese maka ikus mai rezulta fali iha kontestu ida ne’ebé ema ne’ebé lamerese mós hetan”, nia subliña.

Pakote Sosiu-Ekonómiku Atu Kombate Efeitu Negativu Husi COVID-19

Governu sei implementa sistema universál ida kona-ba transferénsia osan, ne’ebé sei garante rendimentu báziku mensál ba uma-kain 214.000 resin no hein katak medida ne’e dura fulan tolu nia laran. Governu mós sei fó subsídiu ba pagamentu ba funsionáriu sira husi setór formál ne’ebé hela iha karantina ka iha uma durante pandemia ne’e, ho governu sei fó kontribuisaun to’o porsentu 60 husi kustu salariál.

Sei sosa foos emerjénsia ba fulan tolu atubele kompensa bainhira foos menus durante pandemia ne’e.

Governu mós sei fornese subsídiu atu garante konektividade, liuhosi Aviaun AirNorth sei kontinua semo ba mai semana ida dala tolu, hodi fornese ligasaun médika no emerjénsia ne’ebé importante ba Darwin. Governu mós sei fó subsídiu ba transporte marítimu merkadoria nian ba mai Atauru no Oé-cusse no sei estende deskarga iha portu marítimu durante oras 24 nia-laran. Ida-ne’e sei evita atrazu sira iha distribuisaun abastesimentu esensiál sira.

Sei fó pulsa gratuita ($15 kada fulan) ba eletrisidade no bee-moos mós sei gratuitu, pagamentu ba kontribuisaun seguransa sosiál, tantu husi traballadór nune’e mós funsionáriu públiku.

Medida hirak ne’e inklui programa kréditu lubuk ida ho osan-funan ki’ik, garantia kréditu ba importadór sasán esensiál sira no empréstimu emerjénsia nian, atu evita falénsia, atu mantein empreza sira loke nafatin no atu apoia família sira hodi resolve sira-nia difikuldade finanseira.

Sei implementa programa atu aumenta oferta ai-han iha parte Tasi Mane no Viqueque, no garante dispunibilidade fatór produsaun agríkola, pekuáriu no peska nian.

Aleinde ne’e, sei fó mós subsídiu ba estudante timor-oan hamutuk 4.200 ne’ebé hela iha rai-li’ur, ne’ebé iha hela situasaun difísil nia-laran, enkuantu estudante timoro-an sira ne’ebé estuda iha rai-laran sei hetan subsídiu internet gratuita atu estuda liuhusi sistema online.

Ikusliu, sei dezenvolve sistema online ba akompañamentu kazu COVID-19 nian sira.

Kustu totál sei proporsionál ba impaktu emerjénsia sanitária nian no medida ekonómika sira sei dinámika no sei ajusta nafatin durante impaktu ekonómiku ne’e.

Jornalista: Antónia Gusmão

Editora: Julia Chatarina

1 KOMENTÁRIU

  1. Membros do Governo durante tinan 10 nia laran ne’e halo Studi Banding ba Nasaun liur ne’e nunca implementa iha TL.. So ba para gasta osan deit.. Sei sira ba focus Studi Banding duni ne’e oras hanesan ne mos ita ladun preucupa konaba Dadus umakain e Dadus Populasaun ona.. Mais na realidade Emergencia hanesan dadauk ne’e kona ita foin arepende katak durante ne’e nunca aproveita iha ukun.. Hatene gasta osan dt mais Qualidade Zero… Liafuan ikus mal dhn Ida ne’e buat foun ida mai ita TL.. Mais ne laos Umakain ida ou Aldeia ida.. Ida ne nasaun nebe tenque preparado.. Mekanismu ba dadus umakain deit fulan rua la resolve ona satan Covid-19 mk numeru ass tan ne’e Governo rungu ranga mais pior mak iha… Cuitado tebes ba ukun nain sira ne’e.. 🤦‍♂️

HAKEREK NO HATÁN

Please enter your comment!
Please enter your name here