Membru Deputadu Khunto, Olinda Guterres. Imajen/Tatoli Egas Cristovão

DILI, 13 maiu 2020 (TATOLI)—Reprezentante povu iha uma fukun Parlamentu Nasionál (PN), Deputada Olinda Guterres, hateten kada loron asina de’it lista prezensa komisaun nian tanba laiha ajendamentu hosi Prezidente Parlamentu Nasionál.

“Loro-loron ami mai asina de’it lista prezenta iha Komisaun nian. Hein, tanba ha’u iha Komisaun D (Ekonomia no Dezenvolvimentu) entaun ha’u asina de’it lista prezensa Komisaun nian. Lista prezenta ida atu tama ba plenária ami la asina tanba laiha ajenda ruma,” Deputada Bankada Kmanek Haburas Unidade Nasionál Timor Oan (KHUNTO), Olinda Guterres, informa ba Agência TATOLI, iha resintu Parlamentu Nasionál, kuarta ne’e.

Deputada Olinda Guterres hatutan, loron segunda-tersa no ohin tama ona loron kuarta, maibé laiha plenária maibé kontinua hein de’it ajenda destituisaun ne’ebé oras ne’e hatama ona ba meza Prezidente Parlamentu Nasionál.

“Ohin, kuarta-feira, ami mai somente asina de’it lista prezensa. La halo servisu depois ami tuur halimar ko’alia, ami iha uma mós atu halo saida di’akliu la’o mai pasear tiha iha parlamentu,” nia dehan.

Entretantu, Deputadu Bankada FRETILIN, António dos Santos “55”, haktuir hahú hosi segunda-feira to’o oras ne’e laiha ajenda ruma.

“Ha’u kontinua tama serbisu tanba ami-nia bankada mak orienta hodi kontinua hein prezidente parlamentu marka ajenda kona-ba mosaun destituisaun ne’e. Tuir loloos, ohin, ami Komisaun D ne’e halo reuniaun maibé adia, ohin parte Komisaun fó de’it lista prezenta ami asina,” nia dehan.

Xefe Bankada UDT/FM, Francisco David Carlos Xavier, rekoñese ikus-ikus ne’e asina de’it lista prezensa komisaun nian no kontinua atualiza informasaun kona-ba pedidu destituisaun ne’ebé hatama hosi bankada tolu.

“Ita hein desizaun saida mak atu akontese iha semana ida ne’e ka semana oin, ha’u iha Komisaun A (Justisa no Konstitusionál) no Komisaun E (Infraestrutura), infelismente ohin ha’u mai Komisaun A nian taka hela hela entaun ha’u asina de’it Komisaun E nian,” nia hateten.

Xefe Bankada UDT/FM ne’e rekoñese laiha plenária fó impaktu ba funsionamentu Parlamentu Nasionál.

“Maibé ita hein took razaun sira husu kona-ba destituisaun ne’e, ita hein de’it saida mak atu akontese,” dehan Deputadu Bankada UDT/FM ne’e.

Tuir observasaun Agência TATOLI, hahú hosi segunda to’o tersa-feira, ohin, deputadu sira hosi bankada tolu (3) kompostu hosi FRETILIN, PLP no FRETILIN kontinua tuur iha sala plenária maibé Bankada CNRT hala’o de’it serbisu de’it iha bankada CNRT nian.

Iha biban hanesan, Deputadu Bankada CNRT, Domingos de Carvalho lakohi komenta asuntu ne’e.

Maibé antes ne’e Vise-Xefe Bankada CNRT, Patrocínio Fernandes dos Reis, hateten laiha plenária la fó impaktu ba funsionamentu Parlamentu Nasionál.

Hatán ba kestaun ne’e, Segundu Vise-Prezidente Parlamentu Nasionál, Deputadu Luis Roberto, fundamenta kualkér ajenda plenária Prezidente Parlamentu Nasionál mak ajenda maibé to’o agora laiha.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here