Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 13 maiu 2020 (TATOLI) – Portavós Sala Situasaun Sentru Integradu Jestaun Krize (CIGC-sigla Portugés) nu’udar mós Koordenadór Ligasaun Ofisiál Ba Forsa Tarefa COVID-19, Rui Maria de Araújo, informa, ekipa Ministériu Saúde (MS) liuhusi Laboratóriu Nasionál halo ona teste ba amostra husi abitante hamutuk 574 ne’ebé hatudu rezultadu negativu ba COVID-19.

Notísia Relevante : SS-CIGC Apresia Polísia Bandu Ezersísiu ho Grupu Boot

“Too ohin loron foti ona amostra hodi analiza hamutuk 574. Hosi númeru ne’e Munisípiu Liquiça nia rezultadu kompleta ona hatudu rezultadu negativu, no husi munisípiu sira seluk no ospitál referral sira seluk ita sei hein rezultadu husi Laboratóriu Nasionál iha balun negativu, maibé ita seidauk bele anunsia tuir munisípiu ka tuir instituisaun,” informa Rui  Maria de Araújo ba jornalista liuhusi konferénsia imprensa iha Sentru Mídia CIGC iha Sentru Konvensaun Dili (CCD), kuarta (13/05/2020).

Rui Araújo hateten, daudaun ne’e ekipa Ministériu Saúde too sentru saúde no ospitál referral sira iha munisípiu sira sei kontinua halo atividade vijilánsia sentinela too loron 15 maiu 2020.

“Kona-ba vijilánsia sentinela planu husi Ministériu Saúde nian koopera ho CIGC too loron 15 maiu 2020 atu bele kompleta amostra ne’e too 600-ital, atu nune’e, bele analiza no reflete iha pontu hotu-hotu iha territóriu,” tenik eis Primeiru-Ministru ne’e.

Amostra ne’ebé foti husi abitante  hamutuk 574 ne’ebé halo ona analiza kompostu husi Munisípiu Aileu na’in-22, Ainaro (17), Baucau (23), Bobonaro (22), Covalima (21), Dili (72), Ermera (22), Lautem (18), Liquiça (40), Manatuto (20), Manufahi (20), RAEOA (24) ho Munisípiu Viqueque na’in-22.

Iha nivel Ospitál Nasionál Guido Valadares rasik, informa Rui Araújo, too ohin loron, rekolla ona amostra 21, Ospitál Referral Baucau (51), Ospitál Referral Maubisi (27), Ospitál Referral Maliana-Bobonaro (32), Ospitál Suai (50) no Ospitál RAEOA 24.

Nia klarifika katak, amostra sira ne’ebé rekolla ona nu’udar amostra reprezentativu hodi bele hato’o informasaun ba estadu no sosiedade Timor-Leste katak, transmisaun surtu COVID-19 ba komunidade kada munisípiu iha duni ka lae.   No tuir planu Ministériu Saúde nian hakarak foti amostra sira-ne’e kada munisípiu para ekipa fó sai rezultadu ho analiza dadus kada munisípiu hodi lori povu tomak luta kontra ameasa surtu COVID-19.

Notísia Relevante : Pasiente COVID-19 Baixa Iha Vera Cruz Hela Na’in-Lima

Eis Ministru Saúde ne’e hatutan, durante ekipa médiku sira foti amostra ne’e hasoru difikuldade, tanba iha komunidade balun sente estigma ka duvida no ta’uk, maibé ekipa médiku fahe informasaun ho loloos no povu sira koopera  di’ak.

 Sei Aprezenta Relatóriu ba Primeiru-Ministru  

Iha parte seluk, Portavós CIGC, Rui Maria de Araújo dehan, implementasaun Estadu Emerjénsia (EE) tama ona ba semana rua hatudu katak, pasiente COVID-19 hamutuk 23 maka rekupera ona no falta ema na’in-lima (5) mak sei baixa iha Sentru Izolamentu Vera Cruz.

Tuir planu iha semana rua tan ekipa CIGC sei aprezenta relatóriu finál ba Primeiru-Ministru Taur Matan Ruak no Komandante Operasionál CIGC hodi foti desizaun. Maibé, molok aprezenta relatóriu ba PM Taur, ekipa CIGC sei aprezenta dadus hodi avalia kondisaun saúde jerál ikus liu husi pasiente COVID-19 na’in-lima ne’ebé presiza semana-rua hodi halo tratamentu saúde iha Sentru Izolamentu Vera Cruz Dili.

“Portantu semana rua tan estadu tenke foti desizaun ho baze proposta ba governu atu foti desizaun oinsá,” Rui Araújo tenik.

Ekipa CIGC mós sei analiza ameasa moras COVID-19 husi nasaun viziñu liu-liu Atambua-Kupang, Indonézia nian ne’ebé daudaun ne’e hatudu moras COVID-19 kada loron kontinua aumenta to’o pasiente pozitivu balun mate ona.

Ekipa CIGC rasik kontinua koopera ho Governu Timor-Leste liu-liu Ministériu Transporte no Telekomunikasaun atu taka lai atividade hotu iha Fronteira no Aeroportu too Timor-Leste livre total husi surtu COVID-19.

CIGC husu mós ba Komandu PNTL liu-liu Unidade Patrullamentu Fronteira (UPF) kontinua halo vijilánsia no kontrola maka’as movimentu  negósiu no atividade tama ilegál iha fronteira  terrestre no tasi.

Jornalista   : Eugénio Pereira

Editór         : Francisco Simões

 

 

HAKEREK NO HATÁN

Please enter your comment!
Please enter your name here