Xefe Bankada CNRT, Duarte Nunes. Imajen/Egas Cristovão

DILI, 13 maiu 2020 (TATOLI)—Bankada Parlamentár Partidu Congresso Nacional da Reconstrução de Timor (CNRT) preparadu hatama fali petisaun ba Tribunál Rekursu hodi husu fiskalizasaun ba aktu ho desizaun Prezidente Repúblika, Francisco Guterres ‘Lú Olo’ nian ligasaun ho inserteza polítiku iha rai-laran.

Xefe Bankada CNRT, Duarte Nunes, argumenta petisaun ne’ebé sei hatama fali durante loron 10 nia laran bazeia ba Konstituisaun RDTL artigu 150.

“Sei iha dalan tanba ami-nia ekipa legál haree hela atu haruka fila-fali ba Tribunál Rekursu, ami preparadu hela atu haruka iha loron 10 nia laran ka semana ida-ne’e tanba sira seidauk estuda asuntu sira-ne’ebé mak ami husu, agora nia legalidade de’it. Ema sira-ne’ebé husu ne’e mak laloos tuir (Tribunál Rekursu) sira-nia entendimentu. Tanba ami-nia intensaun ne’e sira halo interpretasaun ba buat-ne’ebé ami husu ne’e, esensiál mak ida-ne’e,” dehan Duarte Nunes ba jornalista sira iha resintu Parlamentu Nasionál, kuarta ne’e.

Nia fundamenta sidadaun sira bele hatama tanba saida mak deputadu sira labele ba.

“Ami hatama bazeia ba Konstituisaun RDTL artigu 150 tanba 1/5 deputadu bele husu interpretasaun maibé ne’e tribunál mak sei haree. Importante agora ne’e mak ami bele tama odamatan Tribunál Rekursu ka lae, agora ba fali kuandu sira simu no sei halo interpretasaun depois mak ita haree tn,” katak nia.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here